12:58, 20 - تامىز 2018 | GMT +6
قىزدارمەن بىرگە تۇنگى كلۋبقا بارعان ءتورت باسكەتبولشى ازيادا-2018 جارىسىنان قۋىلدى
استانا. قازاقپارات - جاپونيا ۇلتتىق وليمپيادا كوميتەتى ءتورت باسكەتبولشىنى يندونەزيانىڭ دجاكارتا قالاسىندا ءوتىپ جاتقان ازيا ويىندارى-2018 جارىسىنا قاتىستىرماي، ۇيلەرىنە قايتارىپ جىبەردى، - دەپ حابارلايدى Kyodo.
ويىنشىلاردىڭ تۇنگى كلۋبقا بارۋى باستى سەبەپ بولعان. كاتار قۇراماسىن 82:71 ۇپايمەن جەڭگەن جاپونيالىق باسكەتبولشىلار، كوماندالىق فورمانى كيىپ، وليمپيادا اۋىلىنان شىعىپ دجاكارتانىڭ ساۋىقتىرۋ اۋدانىنا بارعان.
ويىنشىلار ءبىرىنشى جاپون مەيرامحاناسىنان تاماق ىشكەن، سودان كەيىن قىزدارمەن بىرگە تۇنگى كلۋبقا بارعان. ويىنشىلاردىڭ مۇنداي ارەكەتىن باسسىزدىق دەپ تاپقان كوميتەت اكىمشىلىگى، باسكەتبولشىلاردى ەلگە قايتارىپ جىبەرگەن.
يندونەزيادا باسكەتبول تۋرنيرى 30- تامىزدا اياقتالادى.