ءا چ-2018: ەڭ جاس فۋتبولشىنىڭ گولى فرانسۋزدارعا جەڭىس اكەلدى

None
None
استانا. قازاقپارات - فۋتبولدان الەم بىرىنشىلىگىنىڭ كەزەكتى ويىنى ەكاتەرينبۋرگ قالاسىنداعى ستاديوندا ءوتتى. مۇندا «س» توبىنداعى فرانسيا مەن پەرۋ قۇرامالارى كەزدەستى، دەپ حابارلايدى قازاقپارات ءتىلشىسى.

تورەشىنىڭ ىسقىرىعى ەستىلىسىمەن فرانسيا فۋتبولشىلارى جىلدام شابۋىلدارعا كوشتى. اۋەلى، «مانچەستەر يۋنايتەد» ۇزدىگى پول پوگبا پەرۋ قاقپاسىنا الىستان شىرەنە تارتتى. ونىڭ سوققىسى قاقپادان ءسال عانا قيىس كەتتى. كەلەسى ساتتە انتۋان گريزمانن «ءسوز» الدى. شابۋىلشى ايىپ الاڭىنا كىرىپ بارىپ تەۋىپ ۇلگىرگەن.

الايدا، وعان دالدىك جەتىسپەدى. ماتچتىڭ 30-مينۋتىندا ويدا جوقتا پەرۋ قۇراماسى گول سوعىپ كەتۋگە شاق قالدى. فرانسۋز قورعاۋشىلارىن الداپ وتكەن گەررەرو ۇرىمتال تۇسقا شىعىپ، جەرلەتە تەپتى. ءبىراق، قاقپاشى يۋگو لوريس كەرەك جەردەن تابىلدى. ىلە-شالا ۇيىمداستىرىلعان قارىمتا شابۋىل فرانسۋزدارعا جەمىسىن بەردى.

شابۋىلشى ويلۆە جيرۋدىڭ تەپكەن دوبى قورعاۋشىدان سەرپىلىپ، كيلليان مباپپەنىڭ اياعىنا ءدوپ ءتۇستى. ال، فرانسيا قۇراماسىنىڭ ساپىنداعى ەڭ جاس ويىنشى تۋرنيردەگى ءوزىنىڭ ءبىرىنشى گولىن سوقتى. وسىلايشا، 19 جاستاعى مباپپە ازىرگە رەسەيدەگى الەم چەمپيوناتىندا گول سوققان ەڭ جاس ويىنشى اتاندى. جالپى، كيلليان مباپپە اۆستراليالىق دانيەل ارزانيمەن بىرگە وسى مۋنديالداعى ەڭ جاس فۋتبولشىلار. ەكەۋىنىڭ دە جاسى 19 دا.

ءبىرىنشى تايمنىڭ سوڭىنا تامان ا. گريزماننان پاس العان ل. ەرناندەس ەسەپتى ەسەلەيتىن مۇمكىندىكتى ءمۇلت جىبەردى.

كەزدەسۋدىڭ ەكىنشى بولىگى پەرۋ اياق دوپشىلارىنىڭ باسىمدىعىمەن باستالدى. جۇيەلى ۇيىمداستىرىلعان شابۋىلدى پەدرو اكينو جويقىن سوققىمەن اياقتادى. ونىڭ تەپكەن دوبى قاقپا باعاناسىنا ءتيىپ، اۋتقا كەتتى. مۇنان سوڭ فرانسۋزدار و. جيرۋ مەن ۋ. دەمبەلە گول سوعاتىن مۇمكىندىكتەرىن پايدالانا المادى. ويىن سوڭىنا قاراي وڭتۇستىك امەريكالىقتاردىڭ كاپيتانى ر. گەررەرو ايىپ دوبىن ورىنداعان. الايدا، فرانسيا قاقپاشىسى بۇل سوققىعا دا تويتارىس بەردى.

توقسان مينۋت تا تۇگەسىلدى. ءسويتىپ، وسى الەم چەمپيوناتىنداعى ەڭ جاس ويىنشىلاردىڭ ءبىرى ك. مباپپەنىڭ گولى فرانسيا قۇراماسىنا جەڭىس اكەلدى. سونىمەن قاتار ەۋروپالىقتار «س» توبىنان كەلەسى اينالىمعا شىققان العاشقى ۇجىم بولدى.

سوڭعى جاڭالىقتار