ۇ ب ت-2018: العاشقى كۇننىڭ قورىتىندىسى

استانا. قازاقپارات - ۇلتتىق تەستىلەۋ ورتالىعىنىڭ باسشىسى رامازان ءالىمقۇلوۆ ۇ ب ت-نىڭ العاشقى كۇنىنىڭ قورىتىندىسىن جاريالادى، دەپ حابارلايدى قازاقپارات ءتىلشىسى.

ونىڭ ايتۋىنشا، كەشە رەسپۋبليكا بويىنشا 13897 مەكتەپ تۇلەگى تەست تاپسىردى. ولاردىڭ 15,5 پروتسەنتى، ياعني 2102 ادام شەكتى ۇپايدى جيناي المادى.

«ەندى، تامىز ايىندا ولار تەستتى ەكىنشى رەت تاپسىرا الادى. ودان دا وتە الماسا، جوعارى وقۋ ورنىنىڭ اقىلى بولىمىنە قابىلدانا بەرەدى. ءبىراق ءبىرىنشى سەمەستردەن كەيىن، ياعني كەلەسى جىلدىڭ قاڭتار ايىندا تەست تاپسىرىپ، ءوز ءبىلىمىن كورسەتۋى كەرەك»، - دەدى ر. ءالىمقۇلوۆ استانادا وتكەن باسپا ءسوز ءماسيحاتىندا.

ورتالىق باسشىسىنىڭ سوزىنە قاراعاندا، 11795 مەكتەپ تۇلەگى تەستتى ويداعىداي تاپسىرىپ شىقتى. ولاردىڭ جيناعان ورتاشا ۇپايى 80,9-دى قۇرادى. وتكەن جىلى اتالعان كورسەتكىش 77,5 ۇپاي بولعان. «دەمەك، بيىل ورتاشا ۇپاي 4 پروتسەنتكە كوتەرىلىپ وتىر دەۋگە بولادى. العاشقى كۇنى تولىق 140 ۇپايدى جيناعان ادام بولعان جوق. الايدا ءبىر تۇلەك 137 ۇپايدى جينادى. الدا ءالى جەتى كۇن بار. سوندىقتان ەڭ جوعارى ۇپاي جينايتىن مەكتەپ تۇلەكتەرى بولادى دەگەن سەنىم بار»، - دەپ اتاپ كورسەتتى ر. ءالىمقۇلوۆ.

ايتا كەتەيىك، كەشە رەسپۋبليكا بويىنشا تەست تاپسىرۋعا بارلىعى 14250 ادام ءوتىنىش بىلدىرگەن بولاتىن. الايدا تەستكە 13897 ادام كەلدى. وسىلايشا، العاشقى كۇنى مەكتەپ تۇلەكتەرىنىڭ 97 پروتسەنتى ۇلتتىق ءبىرىڭعاي تەستىلەۋگە قاتىستى.