ءا چ-2018: ۋرۋگۆاي ساۋد ارابياسىن نەگە جەڭە الماي ءجۇر؟
وڭتۇستىك امەريكا قۇرلىعىنىڭ وكىلدەرى اراب جىگىتتەرىن جەڭە الماي كەلەدى، دەپ حابارلايدى قازاقپارات ءتىلشىسى.
ارينە، جەڭىسكە جەتۋ جونىنەن ۋرۋگايدىڭ ءۇمىتى زور. قۇرامادا كوپتەگەن شەبەرلىگى شىڭدالعان جىگىتتەر بار. ءاربىر قارسىلاسىن ىقتىرىپ، اتويلاپ شىعا كەلەدى. بۇدان بۇرىنعى دوپ دودالارىندا جانكۇيەر كوڭىلىنەن شىعاتىن ويىندار كورسەتكەن ەدى. سول ىزبەن بيىل دا تابىسقا قول جەتكىزەمىز دەگەن ويدا ءجۇر. تاجىريبەلى فۋتبولشىلار جوق ەمەس. سولاردىڭ ءبىرى - يسپانيانىڭ «اتلەتيكو» (مادريد) كومانداسىندا وينايتىن ديەگو گوديندى ايتۋعا بولادى. ول - ۋرۋگۆاي قۇراماسى قورعانىسىندا تاسقامال ويىنشى. يسپانيانىڭ «بارسەلونا» كلۋبىنىڭ شابۋىلشىسى لۋيس سۋارەستى كىم بىلمەيدى؟ فرانتسيانىڭ پسج كومانداسىن ورگە سۇيرەپ جۇرگەن ەديسون كاۆاني دە ءاربىر كەزدەسۋدە قانجىعاسىن مايلاعاندى قولايلى كورەدى.
ساۋد ارابياسى قۇرامىندا مۇنداي جامپوزدار ساناۋلى. يسپانيانىڭ «ۆيلياررەال» كلۋبىنىڭ جارتىلاي قورعاۋشىسى سالەم ءال-دوساري مەن سول ەلدىڭ «ليەۆانتەسىندە» دوپ تەبەتىن فاحاد ءال-مۋۆاللادتان باسقاسىنىڭ بارلىعى ءوز ەلىنىڭ ىشكى بىرىنشىلىگىندە وينايدى. ول ەلدەگى دوپ دوداسىنىڭ دەڭگەيى جوعارى ەمەس ەكەنى تاعى بەلگىلى. ەندەشە، بۇل قۇرامانىڭ الار اسۋى، شىعاتىن تاۋى بيىك بولا قويمايدى. ماماندار دا سولاي بولجام جاساپ وتىر. ولاردىڭ رەسەيمەن كەزدەسۋىندە سول ولقىلىقتار كوزگە ۇرىپ تۇردى. ارابتار جانكۇيەر كوڭىلىنەن شىعاتىن ويىن ورنەگىن كورسەتە المادى. سونىڭ سالدارىنان ءوز قاقپاسىنان جاۋاپسىز بەس دوپ الىپ شىققانىن ءبارىمىز بىلەمىز.
ساۋد ارابياسى قۇراماسىنىڭ باس باپكەرى حۋان انتونيو پيتستسي بۇل پىكىرمەن كەلىسپەيدى. ول ءوز شاكىرتتەرىنىڭ ەشبىر كەزدەسۋىندە قارسىلاسىنىڭ ىعىنا جىعىلا قويمايتىنىن ايتادى. ء«بىز ءاربىر ويىنعا تىڭعىلىقتى دايىندالامىز. قارسىلاس جونىندە بارلىق اقپاراتتى جيناقتايمىز. ءبىزدىڭ بۇل الەم بىرىنشىلىگىندەگى تۇساۋكەسەر ويىنىمىز وتە قيىن بولدى. ءبىزدىڭ قۇرامادا دا جىلدام جىگىتتەر بار. ءبىز تارتىستى ويىن كورسەتەمىز»، - دەدى ول.
ۋرۋگۆايلىق باپكەر وسكار تابارەس تە اتالمىش كەزدەسۋ جايىندا پىكىرىن ءبىلدىردى. «ءبىز ۋرۋگۆايدى الەمدىك فۋتبول كارتاسىنا قايتا الىپ كەلدىك. سىرت كوز ءبىزدى ءالسىز توپقا ءتۇستى دەپ ايتادى. دەگەنمەن بىزگە قارسىلاس قۇرامالاردىڭ بارلىعى ءۇش ۇپايدى وڭاي بەرەتىندەر قاتارىنا قوسىلمايدى»، - دەدى و. تابارەس.
قوس قۇراما ءوز تاريحىندا 3 مارتە كەزدەسپەكشى. ءبىر قىزىعى، ۋرۋگۆاي ازىرگە بۇل قارسىلاسىن جەڭىپ كورگەن جوق. ەكەۋى دە جولداستىق كەزدەسۋ رەتىندە وتكەن. 2002-جىلعى 27- ناۋرىزدا ساۋد ارابياسى قۇراماسى وڭتۇستىك امەريكا وكىلدەرىن 3:2 ەسەبىمەن باسىم ءتۇستى. ال 2014-جىلدىڭ 10- قازانىندا وتكەن ويىن 1:1 ەسەپپەن اياقتالدى. ەندەشە، ۋرۋگۆاي جەڭىسكە جەتسە، سول ولقىلىقتىڭ ورنىن تولتىرادى.
بۇدان بۇرىن پورتۋگاليا - ماروككو قۇرامالارى ويىنى الدىنداعى شولۋ جاسالدى. بۇل كەزدەسۋ بۇگىن، 20- ماۋسىمدا ساعات 21.00 دە وتكىزىلەدى. ويىن «Qazaqstan» ۇلتتىق تەلەارناسىنان تىكەلەي ەفيردە كورسەتىلەدى.
سونداي-اق، بۇگىن ۆ توبىنداعى پورتۋگاليا - ماروككو («Qazsport». 18.00)، يران - يسپانيا («Qazaqstan». 00.00) قۇرامالارى ءوزارا مىقتىلاردى انىقتايدى.