ۇلتتىق ءبىرىڭعاي تەستىلەۋ -2018: اۋديتوريالارعا ۇيالى بايلانىس سيگنالىن تۇنشىقتىراتىن جاڭا قوندىرعىلار ورناتىلدى

استانا. قازاقپارات - قازاقستاندا ۇلتتىق ءبىرىڭعاي تەستىلەۋ وتەتىن اۋديتوريالاردىڭ تەحنيكالىق جابدىقتارى جاڭارتىلدى، دەپ حابارلايدى قازاقپارات ءتىلشىسى.

سايكەسىنشە، بارلىق اۋديتوريادا 4G ۇيالى بايلانىس سيگنالىن تۇنشىقتىراتىن جاڭا قوندىرعىلار جۇمىس ىستەيدى.

«تاعى دا ەسكە سالامىز، ۇ ب ت- نىڭ دۇرىس جاۋاپتار كودى مەملەكەتتىك قۇپيا بولىپ سانالادى جانە ونى تاراتقان ادام قىلمىستىق جاۋاپكەرشىلىككە تارتىلادى. وسىعان بايلانىستى، بارلىق تۇلەكتەردەن بەكىتىلگەن ەرەجەلەردەن اتتاماۋىن سۇرايمىز»، - دەدى ۇلتتىق تەستىلەۋ ورتالىعىنىڭ ديرەكتورى رامازان ءالىمقۇلوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

سونىمەن بىرگە، ورتالىق باسشىسى تەستىلەۋگە تىيىم سالىنعان زاتتارمەن، اسىرەسە ۇيالى تەلەفونمەن كىرەتىن تۇلەكتەردىڭ بار ەكەنىن دە جاسىرمادى.

«ءيا، ونداي جاعدايلاردىڭ بار ەكەنىن جاسىرمايمىز. ءبىراق، بيىل ۇ ب ت وتەتىن اۋديتوريالاردىڭ تەحنيكالىق جابدىقتارى %100 جاڭارتىلدى. سايكەسىنشە، بارلىق اۋديتوريادا 4G ۇيالى بايلانىس سيگنالىن ۇزەتىن جاڭا قوندىرعىلار جۇمىس ىستەيدى. سوندىقتان، مەكتەپ تۇلەكتەرى ۇ ب ت- دا ءتۇرلى قيتۇرقى ارەكەتكە ۋاقىت جوعالتقانشا، ءوز بىلىمىنە عانا سەنگەنى ءجون. بەرىلەتىن 3 ساعات 50 مينۋتتى ءتيىمدى پايدالانىپ، مەملەكەتتىك گرانتقا جەتەتىن بالدى وزدەرى جيناعانى ابزال»، - دەدى ر. ءالىمقۇلوۆ.

ايتا كەتەيىك، ۇلتتىق ءبىرىڭعاي تەستىلەۋ بيىل 15-رەت ۇيىمداستىرىلادى. ەرتەڭ وقۋشىلاردىڭ العاشقى لەگى سىناقتان وتەدى جانە سوڭعى لەك تەستىلەۋدى 1- شىلدەدە اياقتايدى.

بيىل ۇ ب ت- عا رەسپۋبليكا بويىنشا 102 مىڭى قاتىسادى. ونىڭ %75,4 نەمەسە 77243 تۇلەك تەستىلەۋدى قازاق تىلىندە، 25178 تۇلەك (%24,6) - ورىس تىلىندە جانە 46 تۇلەك - اعىلشىن تىلىندە تاپسىرادى.

اۆتور: ايجان سەرىكجان قىزى