ءا چ-2018: سەنەگال تاعى دا سەنساتسيا جاساي ما
رەسەي استاناسى - ماسكەۋ قالاسىنداعى «سپارتاك» ستاديونىندا پولشا مەن سەنەگال قۇرامالارى دوپ تەبەدى، دەپ حابارلايدى قازاقپارات ءتىلشىسى.
اشىعىن ايتقاندا، بۇل كەزدەسۋگە جانكۇيەر اسا زور قىزىعۋشىلىق تانىتا قويمايدى. سەبەبى بەلگىلى، قوس قۇرامانىڭ دا الەمدىك فۋتبولدا الىپ بارا جاتقان بەدەلى جوق. ورتانقول قۇرامالار ساناتىنا ەنەدى.
راس، قۇرامىندا شەبەرلىگى شىڭدالعان ساڭلاقتار بار. الدىمەن پولشا جايىندا ايتا كەتەلىك. پولياك جىگىتتەرى بۇعان دەيىن 4 مارتە ءدۇبىرلى دوداعا كەلدى. 1974، 1982 -جىلدارى قولا جۇلدەگەر اتاندى. بۇل ولاردىڭ ءداۋىرى دۇرىلدەپ تۇرعان كەزى بولسا كەرەك-تى. ودان كەيىن قاتارداعى قۇرامالار ساناتىنا ەندى. ەۋروپا بىرىنشىلىگىندە 2016 -جىلى شيرەك فينالعا دەيىن جەتتى. ولاردىڭ ساپىندا گەرمانيانىڭ «باۆاريا» كومانداسىنىڭ شابۋىلشىسى روبەرت ليەۆاندوۆسكي بار. ۇستىمىزدەگى جىلدىڭ 21 -تامىزىندا وردا بۇزار وتىز جاسقا تولاتىن ساڭلاق ءوز قۇراماسىن ورگە سۇيرەي الا ما؟ ول گول سوعۋ جونىنەن قۇراماسىندا رەكورد ورناتقان. بۇگىنگى كۇنگە دەيىن 91 مارتە جاسىل الاڭعا شىعىپ، قارسىلاستار قاقپاسىن 51 مارتە ءدال كوزدەدى.
وسىنىڭ ناتيجەسىندە ول 1963-1980 -جىلداردا قۇراما جەيدەسىن كيگەن ۆلودزيمەج ليۋبانسكييدىڭ رەكوردىن جاڭارتتى. ازىرگە ونى باسىپ وزاتىن ەشكىمنىڭ قاراسى كورىنىپ تۇرعان جوق.
پولشا ىرىكتەۋ كەزەڭىندە ءبىزدىڭ قازاقستان قۇراماسىمەن بىرگە ە توبىندا سىنعا تۇسكەنى بەلگىلى. العاشقى تۋردا 2016 -جىلدىڭ 4 -قىركۇيەگىندە ولار ءبىزدىڭ جىگىتتەرمەن 2:2 ەسەبىمەن تەڭ وينادى. ەسەسىنە قارىمتا كەزدەسۋدە 3:0 ەسەبىمەن ويسىراتا جەڭدى. ىرىكتەۋ كەزەڭىندە سىرت الاڭدا دانيادان 0:4 ەسەبىمەن جەڭىلىپ جانە ءبىزدىڭ قۇرامامەن تەڭ ويناعانى بولماسا قالعانىنىڭ بارلىعىندا ءۇش ۇپاي ولجالادى.
ءوز توبىندا ءبىرىنشى ورىنمەن الەم بىرىنشىلىگىنە تىكەلەي جولداما الدى. قۇرامانىڭ باس باپكەرى ادام ناۆالكا شاكىرتتەرىنىڭ الداعى ويىنعا تاس ءتۇيىن دايىن ەكەنىن جەتكىزدى. العان جاراقاتىنا بايلانىستى قورعاۋشى كاميل گليكتىڭ سەنەگالعا قارسى شىعۋ- شىقپاۋى بەلگىسىز بولىپ وتىر. ءقازىر ولار فيفا رەيتينگىندە 8-ورىندا كەلەدى.
سەنەگال قۇراماسى 2002 -جىلى ايدى اسپانعا ءبىر-اق شىعاردى. افريكالىقتار ىرىكتەۋ كەزەڭىندە جارىستىڭ ءبىرىنشى ساتىسىندا بەنيندى ورتا جولدا تاستاپ، توپتىق ساتىسىندا ماروككو، مىسىر، الجير، ناميبيا سەكىلدى قارسىلاستارىن ارتتا قالدىردى. وسىلايشا وڭتۇستىك كورەيا مەن جاپونياداعى ءدۇبىرلى دوداعا جەتكەن افريكالىق قۇراما العاشقى كەزدەسۋدە ازۋلى فرانسيانى 1:0 ەسەبىمەن جەڭىپ، ودان كەيىن دانيامەن 1:1، ۋرۋگۆايمەن 3:3 ەسەبىمەن تەڭ وينادى. جارىستىڭ 1/8 ساتىسىندا شۆەتسيانى قوسىمشا كەزەڭدە 2:1 ەسەبىمەن جەڭدى. ولاردىڭ ەكپىنىن تۇركيا باستى.
تۇرىك جىگىتتەرى شيرەك فينالدا ساتىسىندا سەنەگالدى قوسىمشا كەزەڭدە 1:0 ەسەبىمەن ءسۇرىندىردى. ودان كەيىنگى جىلداردا مۇنداي قارقىندى ويىنىمەن دارالانا قويعان جوق.
ەسەسىنە ولار افريكا ۇلتتارى كۋبوگىنىڭ فينالدىق كەزەڭىنە 14 مارتە شىعىپ، 2002 -جىلى كۇمىس جۇلدەگەر بولدى. ف ي ف ا رەيتينگىسىندە ولار 27-ورىندا كەلەدى. وسىدان 16 جىل بۇرىن قۇراما ساپىندا وزگە ويىنشىلار جاسىنداي جارقىلداپ كوزگە تۇسكەن ەدى. بۇل كەزەڭدە قۇراماعا فرانسۋز مامانى بريۋنو مەتسيۋ باپكەرلىك جاسادى. قازىر ولاردىڭ ورنىن جاستار الماستىردى. وسىنداي ۇزدىكتەر قاتارىندا انگليانىڭ «ليۆەرپۋل» كومانداسىندا تەر توگىپ جۇرگەن ساديو مانەنى ايتۋعا بولادى. 2015 -جىلدان بەرى ۇلتتىق قۇرامانى جەرگىلىكتى مامان اليۋ سيسسە جاتتىقتىرادى.
جالپى، سەنەگال تاعى ءبىر سەنساتسيا جاساي ما دەگەن ءۇمىت بار. ويتكەنى، بۇل توپتاعى قۇرامالاردىڭ شەبەرلىك دەڭگەيى ءبىر-بىرىمەن قارايلاس. توپتا پولشا مەن سەنەگالدان وزگە كولۋمبيا مەن جاپونيا سىنعا تۇسەدى.
بۇل كەزدەسۋ بۇگىن، 19 -ماۋسىمدا بولادى. ويىن 21.00-دە «Qazaqstan» ۇلتتىق تەلەارناسىنان تىكەلەي ەفيردە كورسەتىلەدى.
قالعان ويىنداردىڭ تولىق كەستەسىن مىنا جەردەن كورۋگە بولادى.
ءادىلجان ۇمبەت