ءا چ-2018: بەلگيا قۇراماسى پانامالىقتاردى ويسىراتا جەڭدى

استانا. قازاقپارات - فۋتبولدان الەم بىرىنشىلىگىندە تاعى ءبىر ويىن مارەسىنە جەتتى.

رەسەيدىڭ سوچي قالاسىنداعى «فيشت» ستاديونىندا G توبىن بويىنشا وتكەن بەلگيا مەن پاناما قۇرامالارى اراسىنداعى كەزدەسۋدە ەۋروپالىقتار قارسىلاستارىن 3:0 ەسەبىمەن ويسىراتا جەڭدى، دەپ حابارلايدى قازاقپارات ءتىلشىسى.

ءبىز بۇدان بۇرىن بەلگيا - پاناما قۇرامالارى اراسىنداعى كەزدەسۋ جايىندا از-كەم بايانداپ كەتكەن ەدىك.

ورتالىق امەريكا وكىلدەرى توسىنسىي جاساي ما دەگەن ءۇمىت تە بولعان. دەگەنمەن ەدەن ازار باستاعان بەلگيالىق جىگىتتەر بۇل جولى وزدەرىنىڭ تاجىريبەسى مول ەكەنىن تاعى ءبىر مارتە دالەلدەدى.

الەمدىك رەيتينگتە ۇزدىك ۇشتىكتى تۇيىندەپ تۇرعان بەلگيا ءدۇبىرلى دوپ دوداسىنىڭ تابالدىرىعىن ەندى اتتاعان پاناما قۇراماسى قاقپاسىنا بىردەن- اق لاپ قويدى. تاجىريبە ازدىعىنان با، ورتالىق امەريكادان كەلگەن جىگىتتەر قارسىلاستارى شابۋىلعا شىققاندا ابدىراپ قالعانى اڭعارىلدى. بۇل - العاشقى ون مينۋتتىڭ ىشىندە بايقالعان كورىنىس. بۇدان كەيىن پانامالىقتار ەس جيعان سەكىلدى. بىرىنشىلىككە بەكەردەن-بەكەر كەلمەگەنىنە جۇرتتىڭ كوزىن جەتكىزۋ ماقساتىندا تىرىسىپ باقتى. دەسە دە مۇنداي قارسىلاسىنان بەلگيالىقتار ونشا ىعا قويعان جوق. تەزىرەك گول سوعۋ مۇمكىندىگىن ىزدەدى. ءتىپتى، ولار ۇيىمداستىرعان شابۋىلدار ەسەبىنەن جاڭىلىسىپ قالاتىنداي بولدىق.

ويىننىڭ 6-مينۋتىندا بەلگيالىقتار پاناما قۇراماسى ماڭىندا وسىنداي ءساتتى جانكۇيەر نازارىنا ۇسىندى. بەلگيا جامپوزى ەدەن ازار ارىپتەسى ياننيك فەررەيرا كاررا́سكونىڭ قاقپاعا دوپ تەبۋىنە مۇمكىندىك جاساعان ەدى. الايدا، كارراسكونىڭ تەپكەن دوبىن پانامالىق قاقپاشى حايمە پەنەدو قاقشىپ الدى. ارادا ءبىر مينۋت وتكەندە ورتالىق امەريكادان كەلگەن قۇراما قاقپاسى ماڭىندا وسىنداي جاعداي بولدى.

بەلگيالىق دريس مەرتەنس ءوز ارىپتەسىنەن گول سوعۋعا ادەمى مۇمكىندىك الدى. دوپ قاقپا ماڭدايشاسىنا ءتيىپ، حايمە پەنەدو ونى قولىنا ۇستاپ الدى.

10-مينۋت. تاعى دا سول پاناما قاقپاسىنىڭ ماڭى. سول قۇرامانىڭ ويىنشىسى رومان توررەس ءوز قاقپاشىسىنا دوپ تاستاۋعا نيەتتەنگەن ەدى. ونى ەدەن ازار ءوز پايداسىنا جاراتىپ كەتە جازدادى.

تاعى ءبىر قاۋىپتى ءسات 20-مينۋتتا بولدى. بۇل جولى بەلگيالىق كيەۆين دە برەينە وڭ قاناتتان قاقپاعا دوپ باعىتتادى. سوڭعى ساتتە ونى پانامالىق رومان توررەس سىرتقا شىعارىپ ۇلگەردى. ەكى مينۋت وتكەندە كيەۆين دە برەينە تەپكەن دوپ قاقپادان بيىك كەتتى.

قىسقاسى، ويىننىڭ ءبىرىنشى كەزەڭىنىڭ باسىم بولىگىندە ەۋروپا قۇرلىعىنىڭ وكىلدەرى قارسىلاستارىن تىقسىرىپ باقتى. ءتىپتى، دوپ نەگىزىنەن پاناما قاقپاسى الدىندا ءجۇردى دەسەك تە بولادى. ءبىرىنشى كەزەڭدە قوس قاقپادان دا ساڭىلاۋ تابىلعان جوق. قۇرامالار 0:0 ەسەبىمەن دەمالىس بولمەسىنە بەتتەدى.

ەكىنشى كەزەڭ باستالا سالىسىمەن بەلگيالىقتار دەگەنىنە جەتتى. دريس مەرتەنستىڭ وڭ قاناتتان شىرەنە تەپكەن دوبى پاناما قاقپاسى تورىندا تۋلاپ جاتتى. بۇل 47-مينۋت بولاتىن.

ويىن بارىسىندا بايقاعانىمىز، پاناما بىرىنشىلىك بارىسىندا توسىنسىي جاساۋعا شاماسى كەلە قويمايتىن سەكىلدى. ولاي دەۋىمىزگە نەگىز بار. ولاردا جۇيەلى ويىن ورنەگى بايقالا قويمايدى. سوندىقتان ولار ءۇشىن ءاربىر كەزدەسۋدە ءىرى ەسەپپەن جەڭىلىسكە جول بەرمەۋ باستى ماقساتتىڭ بىرىنە اينالسا كەرەك- ءتى.

بەلگيالىقتار 69-مينۋتتا ەسەپتى ەسەلەي ءتۇستى. كيەۆين دە بريۋينە سول قاناتتان قاقپانىڭ الىس بۇرىشىنا دوپ اسىرعان ەدى. ونى ءوزىنىڭ ارىپتەسى رومەلو لۋكاكۋ ءتيىمدى پايدالاندى. گول سوقتى. ەسەپ 2:0. 75-مينۋتتا رومەلو لۋكاكۋ دۋبل جاسادى. پانامالىق قاقپاشىمەن بەتپە- بەت شىققان ول ەشبىر ساسپاستان ونى قاقپا تورىندا تۋلاتتى. ەسەپ 3:0.

بۇدان كەيىن پاناما قۇراماسى ەسەپتى قىسقارتۋعا تىرىسىپ باقتى. الايدا وعان ەۋروپا قۇرلىعىنىڭ وكىلدەرى جول بەرگەن جوق.

 

ءادىلجان ۇمبەت