ءا چ-2018: شۆەتسيا وڭتۇستىك كورەيانى جەڭدى

استانا. قازاقپارات - بۇگىن 2018-جىلعى الەم چەمپيوناتىنىڭ F توبىنىڭ ءبىرىنشى تۋر ويىندارى اياقتالدى. وندا شۆەتسيا وڭتۇستىك كورەيا قۇراماسىنان باسىم ءتۇستى دەپ حابارلايدى قازاقپارات ءتىلشىسى.

شۆەتسيا قۇراماسى وسى جۇپتىڭ ايقىن فاۆوريتى سانالعان بولاتىن. مۇنى دالەلدەۋ ءۇشىن ياننە اندەرسسون شاكىرتتەرى العاشقى مينۋتتاردان شابۋىلعا لاپ قويدى. كوپ ۋاقىت دوپسىز جۇرگەن وڭتۇستىك كورەيا قۇراماسى 45 مينۋتتا جالعىز-اق مارتە قاقپاعا قاراي دوپ تەبە الدى، ءبىراق سونىڭ ءوزى قيىس كەتتى. باپكەر سين تحە ەڭ ەكىنشى نومىرمەن ويناۋ تاكتيكاسى ءبىرىنشى تايمدا گول جىبەرمەۋدىڭ كەپىلى بولدى.

ەكىنشى بولىمدە سكانديناۆ تۇبەگىنىڭ وكىلدەرى ساپالى ويناي باستاپ، شابۋىلىنا مازمۇن كىردى. بۇل كورەي فۋتبولشىلارىنىڭ ءوز ايىپ الاڭىندا قاتەلىك جىبەرۋىنە سەبەپ بولدى. 63-مينۋتتا قورعاۋشىلاردىڭ يون گۆيدەتتيدى شالىپ جىعىلتقانىن كورگەن تورەشى ۆيدەوقايتالاۋعا جۇگىنىپ، پەنالتي بەلگىلەدى. ونى 33 جاستاعى كوماندا كاپيتانى اندرەاس گرانكۆيست ءساتتى ورىنداپ، ەسەپ اشتى. 1:0 ەسەبى ويىن سوڭىنا دەيىن وزگەرگەن جوق.

وسى جەڭىستەن كەيىن 3 ۇپاي العان شۆەتسيا مەكسيكامەن بىرگە F توبىنىڭ كوشباسشىسىنا اينالدى.

كەشە وسى توپتىڭ العاشقى ماتچىندا مەكسيكا گەرمانيا قۇراماسىن جەڭگەن بولاتىن.