ءا چ-2018: پانامانىڭ بەلگياعا قارسى قانداي ايلاسى بار؟

None
None
استانا. قازاقپارات - بۇگىن فۋتبولدان الەم بىرىنشىلىگىنىڭ كەزەكتى ويىندارى وتەدى. بۇل كۇنى G توبىنداعى بەلگيا مەن پاناما قۇرامالارى ءوزارا شەبەرلىك بايقاسادى، دەپ حابارلايدى قازاقپارات ءتىلشىسى.

بەلگيا قۇراماسىن جانكۇيەرلەر جاقسى بىلەدى دەۋگە نەگىز بار. بۇل ەلدەن تالاي مىقتى فۋتبولشىلار كوپتىڭ كوزايىمىنا اينالدى. سوڭعى جىلداردا دا ولاردىڭ قاتارى سيرەگەن ەمەس. انگليانىڭ «چەلسي» كلۋبىن ورگە سۇيرەپ جۇرگەن ساڭلاقتىڭ ءبىرى - ەدەن ازاردىڭ شەبەرلىگى تالايدى تاڭداي قاقتىرعانى ءسوزسىز. جالپى، اتالمىش قۇراما دوپ دوداسىنىڭ فينالدىق كەزەڭىندە بۇعان دەيىن 12 مارتە باق سىناعان ەكەن. ازىرگە اۋىز تولتىرىپ ايتارلىق جەتىستىگى - 1986-جىلعى ءتورتىنشى ورىن.

سول جىلى بەلگيا ءوز توبىنان ءۇشىنشى ورىنمەن جارىستىڭ كەلەسى كەزەڭىنە شىقتى. الدىمەن مەكسيكادان 1:2 ەسەبىمەن جەڭىلگەن ولار كەلەسى كەزدەسۋدە ءدال وسى ەسەپپەن يراكتى تىزە بۇكتىرىپ، سوڭعى ويىندا پاراگۆايمەن 2:2 ەسەبىمەن تەڭ ناتيجەگە قاناعات ءبىلدىردى. جارىستىڭ 1/8 فينالىندا ك س ر و قۇراماسىن 4:3 ەسەبىمەن جەڭىپ، ودان سوڭ ازۋلى يسپانيادان دا ايلاسىن اسىردى. بۇل كەزدەسۋدە ويىننىڭ نەگىزگى كەزەڭى 1:1 ەسەبىمەن اياقتالدى.

جەڭىمپاز پەنالتي ارقىلى انىقتالدى. ودان كەيىنگى جىلداردا ولاردىڭ تولىمدى تابىسى بولا قويعان جوق. ەۋروپا بىرىنشىلىگىندە 1972-جىلى قولا السا، 1980-جىلى كۇمىس جۇلدەگەر اتاندى. سوڭعى كەزەڭدە زور جەتىستىگىمەن ماقتانا المايدى. قازىرگى تاڭدا فيفا رەيتينگىندە 3-ورىندا تۇر. بيىلعى الەم بىرىنشىلىگىنە ىرىكتەۋ كەزەڭىندە بەلگيا فۋتبولشىلارى اسا قينالا قويعان جوق. ن توبىندا سىنعا تۇسكەن ولار 10 ويىننىڭ 9 ىندا جەڭىسكە جەتىپ، تەك بىرەۋىندە تەڭ ناتيجەگە كورسەتتى.

جالپى العاندا، روبەرتو مارتينەستىڭ شاكىرتتەرى 19 كەزدەسۋ بويى جەڭىلىپ كورگەن ەمەس. ونىڭ ىشىندە 14 ويىندا قارسىلاسىنان باسىم تۇسسە، 5-ەۋىندە تەڭ تارقاستى.

دوپ دوداسىنا كەلگەنشە ولار 4 جولداستىق كەزدەسۋ وتكىزدى. الدىمەن پورتۋگاليامەن 0:0 ەسەبىمەن تەڭ ءتۇسىپ، سودان كەيىن ساۋد ارابياسىن 4:0, ەگيپەتتى 3:0، كوستا- ريكانى 4:1 ەسەبىمەن جەڭدى. ءبىر سوزبەن ايتقاندا، ايتۋلى الامانعا دايىندىعى جامان ەمەس. قۇرامىندا ەدەن ازارمەن بىرگە انگليانىڭ «مانچەستەر سيتي» كلۋبىنىڭ جارتىلاي قورعاۋشىسى كيەۆين دە برёينە سەكىلدى جامپوزدار بار.

ال پاناما جايىندا قالىڭ جانكۇيەردىڭ بىلەتىنى شامالى. ولار 1974-جىلعا دەيىن الەم بىرىنشىلىگىنىڭ ىرىكتەۋ كەزەڭىندە باق سىناعان جوق. 1978-2014-جىلدار ارالىعىندا ول كەزەڭنەن وتە المادى. بيىلعى دوپ دوداسىنىڭ ىرىكتەۋ كەزەڭى باستالاردان بۇرىن ولار رەسەيدەگى دوپ دوداسىنا كەلەتىن 32 ۇزدىكتىڭ قاتارىندا بولامىز دەپ ارمانداماعان شىعار.

ول ارمان اقيقاتقا اينالدى. ولار اقش جانە گوندۋراس سەكىلدى تاجىريبەلى قۇرامالاردى ارتقا قالدىردى. ف ي ف ا رەيتينگىندە 55-ورىندا تۇر. قۇراما ساپىندا ەۋروپا بىرىنشىلىگىندە دوپ تەبەتىندەر جوققا ءتان. كوبىسى ا ق ش، مەكسيكا، گۆاتەمالا ەلدەرىندە وينايدى. سونداي-اق، ولار بۇگىنگە دەيىن ەۋروپا قۇرامالارىن ەشقاشان جەڭىپ كورگەن جوق. ماماندار پانامانى بيىلعى بىرىنشىلىكتەگى ەڭ ءالسىز قۇرامانىڭ قاتارىندا ساناپ وتىر. وعان وزدەرى كەلىسپەيدى. جوعارى جەتىستىككە قول جەتكىزۋ جولىندا بار كۇشىمىزدى سالامىز دەگەن نيەتى بار.

بۇل كەزدەسۋ بۇگىن، 18- ماۋسىمدا رەسەيدىڭ سوچي قالاسىنداعى «فيشت» ستاديونىندا بولادى. ويىن استانا ۋاقىتىمەن 21.00-دە «Qazaqstan» ۇلتتىق تەلەارناسىنان تىكەلەي ەفيردە كورسەتىلەدى.

سوڭعى جاڭالىقتار