ءا چ - 2018: فرانسيا تارتىستى ماتچتا اۋستراليانى ۇتتى
بۇدان جيىرما جىل بۇرىن زينەدين زيدان باستاعان فرانسۋزدار الەم چەمپيونى اتانعانى بەلگىلى. 2006-جىلى فينالدىق ماتچتا يتالياندىق قورعاۋشى ماركو ماتەراتستسيدى باسپەن سوعىپ، زيدان الاڭنان قۋىلعاننان كەيىن فرانسۋزدار ويىننان كەيىنگى 11 مەترلىك سەريادا ۇتىلىپ، كۇمىس جۇلدەنى قاناعات تۇتقان ەدى.
قازىر فرانسيا قۇرامىندا زينەدين زيدانداي ۇلى ويىنشى بولماعانىمەن، پول پوگبا، انتۋان گريزمانن، كيليان مباپپە سياقتى اتىنان ات ۇركەتىن مىقتىلار جەتكىلىكتى. سوندىقتان 1998-جىلعى الەم چەمپيونى ديدە دەشام شاكىرتتەرىنىڭ بيىلعى بىرىنشىلىك فاۆوريتتەرىنىڭ ءبىرى سانالۋى ابدەن زاڭدى.
اۋستراليامەن وتكەن ماتچ تا فرانسۋزداردىڭ شابۋىلىمەن باستالدى. العاشقى التى مينۋتتىڭ وزىندە ولار قاقپاعا ءۇش بىردەي سوققى جاساپ ۇلگەردى. بۇل ساتتەردە اۋستراليا قاقپاشىسى مەتيۋ رايان سەنىمدى وينادى. اۋستراليالىقتار فرانسۋزداردىڭ ۇشقىر قيمىلىنا ىلەسە الماي، ويىن ءتارتىبىن ءجيى بۇزۋعا ءماجبۇر بولىپ جاتتى. دەگەنمەن ولار دا 12-مينۋتتا ايىپ دوبىن ورىنداي الدى. 17-مينۋتتا سونداي ستاندارتتىق جاعدايدان كەيىن فرانسيا قاقپاشىسى ۋگو لوريس اسا قاۋىپتى سوققىنى قايتارا ءبىلدى.
ەكىنشى تايمدا پول پوگبانىڭ پاسىنان كەيىن ايىپ الاڭىنا ەنە بەرگەن ا. گريزماندى اۋستراليالىق قورعاۋشى شالىپ قۇلاتتى. ۋرۋگۆايلىق تورەشى اندرەس كۋنيا باستاپقىدا ويىندى جالعاستىرۋعا بەلگى بەرگەنىمەن، بەينەقايتالاۋدى قاراپ شىققاننان كەيىن 11 مەترلىك پەنالتيدى بەلگىلەدى. وسىلايشا 58-مينۋتتا گريزمانن ايىپ نۇكتەسىنەن ءمۇلت كەتكەن جوق - 1:0.
ارادا ءۇش مينۋت وتەر-وتپەستە ستاندارتتى جاعدايدان كەيىن فرانسيالىق قورعاۋشى ساميۋەل ۋمتيتي ءوز ايىپ الاڭىندا قولمەن ويناپ قويدى. بۇل جولى 11 مەترلىك پەنالتيدى اۋستراليالىق ميلە ەديناك ءدال ورىندادى.
ماتچ بىتۋگە 20 مينۋتتاي قالعاندا، د. دەشام شابۋىل شەبىن كۇشەيتۋ ماقساتىندا ا. گريزمانن مەن ۋسمان دەمبەلەنىڭ ورنىنا وليۆە جيرۋ مەن نابيل فەكيردى شىعاردى. 81-مينۋتتا پ. پوگبانىڭ سوققىسىنان كەيىن دوپ قاقپا ماڭدايشاسىنا ءتيىپ، ىشىنە ەنىپ، قايتا شىقتى. مۇنى گولدى اۆتوماتتى تۇردە ەسەپتەۋ جۇيەسى ءدال كورسەتتى - 2:1.
كەزدەسۋ سوڭىنا تامان اۋستراليالىقتار قارقىندى كۇشەيتكەنىمەن، فرانسۋزدار جەڭىستى ساقتاپ قالا الدى.
بۇل ويىن الەم چەمپيوناتىندا كەز كەلگەن قارسىلاستى قالپاقپەن ۇرىپ الۋعا بولمايتىندىعىن، قاي كوماندانىڭ دا فاۆوريتتەرمەن تايتالاسا الاتىندىعىن كورسەتتى.
ەسكە سالا كەتەيىك، س توبىندا سونداي-اق پەرۋ مەن دانيا كوماندالارى دا وينايدى. ءار توپتان ۇزدىك اتانعان قوس قۇراما پلەي-وفف كەزەڭىنە وتەدى.