ۇلتتىق ءبىرىڭعاي تەست-2018: تەست سۇراقتارى 50 پايىزعا جاڭاردى
بۇل تۋرالى بۇگىن ۇكىمەت ۇيىندە وتكەن باسپا ءسوز ءماسليحاتىندا ۇلتتىق تەستىلەۋ ورتالىعىنىڭ ديرەكتورى رامازان ءالىمقۇلوۆ ايتتى، دەپ حابارلايدى قازاقپارات ءتىلشىسى.
«اعىمداعى جىلى ۇ ب ت 15- رەت وتەيىن دەپ وتىر. وسى ۋاقىت ارالىعىندا شامامەن 1,5 ميلليون تۇلەك ۇلتتىق ءبىرىڭعاي تەستىلەۋگە قاتىستى. قازىرگى ۋاقىتتا 2018-جىلدىڭ ۇ ب ت- سىنا دايىندىق شتاتتىق رەجىمدە جۇرگىزىلىپ جاتىر. بارلىق اۋديتوريا دايىن. وزدەرىڭىز دە بىلەتىندەي، بيىل ونىڭ فورماتى وزگەرمەيدى. ءۇش مىندەتتى ءپان بولادى: قازاقستان تاريحىنان 20، ساۋاتتى وقۋدان 20، ماتەماتيكالىق ساۋاتتىلىقتان 20 جانە تاڭداپ الىنعان 2 پاننەن 30 سۇراقتان»، - دەدى ول.
ورتالىق باسشىسىنىڭ ايتۋىنشا، بۇگىندە رەسپۋبليكالىق اپەللياتسيالىق كوميسسيانىڭ مۇشەلەرى ىرىكتەپ الىنعان. وعان 54 ادام كىرىپ وتىر.
«اپەللياتسيا تەتىگى دە ساقتالادى، ەشقانداي وزگەرىس جوق. ياعني، ۇ ب ت تاپسىرعان تۇلەك كەلەسى كۇنى ساعات 13:00 گە دەيىن داۋ تۋدىرعان ساۋالعا بايلانىستى جەرگىلىكتى اپەللياتسيالىق كوميسسياعا ءوتىنىم بەرە الادى. ودان كەيىن ەگەر جەرگىلىكتى كوميسسيا داۋلاسۋعا سەبەپ بار دەپ شەشەتىن بولسا، وندا ماتەريالداردى رەسپۋبليكالىق كوميسسياعا بەرەدى»، - دەدى ورتالىق باسشىسى.
ونىڭ دەرەگىنشە، وتكەن جىلى 198 اپەللياتسيالىق شاعىم تۇسسە، ونىڭ 50 پايىزى تەحنيكالىق ماسەلەلەرگە قاتىستى بولعان. مازمۇنىنا قاتىستى 98 ماسەلە كوتەرىلىپ، قاناعاتتاندىرىلعان.
«وتكەن جىلى ۇ ب ت- نىڭ تەست تاپسىرمالارى 40 مىڭ بولسا، سونىڭ 98 سۇراعى، ياعني 0,02 پايىزى عانا داۋ تۋدىردى. الەمدىك تاجىريبەدە 1 پايىزعا دەيىن قالىپتى بولىپ ەسەپتەلەدى. ءبىز بۇل دۇرىس كورسەتكىش دەپ سانايمىز. اعىمداعى جىلى تەست سۇراقتارىنىڭ بازاسى 50 پايىزعا جاڭاردى جانە بيىلعى ۇ ب ت- دا 80 مىڭ سۇراق بولادى»، - دەدى ول.