ءا چ-2018: ەستە بولار 10 دەرەك

استانا. قازاقپارات - بۇگىن، 14 -ماۋسىمدا رەسەيدە فۋتبولدان الەم بىرىنشىلىگى جالاۋىن كوتەرەدى.

ءوز تاريحىندا 21- مارتە وتەتىن ءدۇبىرلى دودا بويىنشا ايرىقشا 10 دەرەكتى قازاقپارات ءتىلشىسى وقىرمان نازارىنا ۇسىنادى.

ايتۋلى الاماندى تاماشالاۋ ماقساتىندا رەسەيگە 1 ميلليون جانكۇيەر كەلەدى دەپ كۇتىلۋدە. بۇل - تۋرنيردىڭ ۇيىمداستىرۋشى مامانداردىڭ ستاتيستيكالىق اقپاراتى.

مۋنديالدى الەم حالقىنىڭ ۇشتەن ءبىر بولىگى تەلەديدار ارقىلى تاماشالايدى دەپ جوسپارلانىپ وتىر. ول شامامەن 3 ميلليارد ادامعا جۋىقتايدى.

2018 -جىلعى الەم بىرىنشىلىگىندە ەۋروپادان - يسلانديا، سولتۇستىك امەريكادان - پاناما قۇرامالارى ءدۇبىرلى دودانىڭ فينالدىق كەزەڭىندەگى تۇساۋكەسەر ويىندارىن وتكىزەدى.

بۇگىنگى كۇنگە دەيىن فينالدىق كەزەڭگە كوپ قاتىسۋ جونىنەن برازيليا قۇراماسى الدا تۇر، ولار 20 مارتە ايتۋلى الاماندا باق سىناعان. ودان كەيىنگى ورىندارداعى يتاليا مەن گەرمانيا - 18، ارگەنتينا - 16، انگليا، فرانسيا، يسپانيا - 14، ۋرۋگۆاي مەن بەلگيا 14 مارتە باق سىناۋىمەن ەرەكشەلەنىپ تۇر.

قازىرگە دەيىن چەمپيون بولۋ مارتەبەسىنە نەبارى 7 قۇراما قول جەتكىزگەن.

چەمپيوندىق اتاققا برازيليا 5 (1958، 1962، 1970، 1994، 2002) مارتە قول جەتكىزىپ، بۇل جونىنەن كوش باستاپ تۇر. ودان كەيىنگى ورىندارداعى گەرمانيا (1954، 1974، 1990، 2014) جانە يتاليا (1934، 1938، 1982، 2006) ءتورت- تورتتەن كۋبوك السا، ارگەنتينا (1978، 1986) جانە ۋرۋگۆاي (1930، 1950) ەكى-ەكىدەن چەمپيون اتاندى. ال فرانسيا (1998)، يسپانيا (2010)، انگليا (1966) ءبىر-ءبىر مارتە چەمپيوندىق تۇعىرعا كوتەرىلدى.

قازىرگە دەيىن چەمپيوندىق كۋبوكتى تەك ەۋروپا جانە وڭتۇستىك امەريكا قۇرلىقتارىنىڭ قۇرامالارى توبەسىنە كوتەرگەن.

برازيليا جانە گەرمانيا قۇرامالارى بىردە- ءبىر رەت الەم بىرىنشىلىگىنىڭ ىرىكتەۋ كەزەڭىندە سۇرىنبەي، فينالدىق كەزەڭىنە جولداما العان. تەك گەرمانيا 1930 جانە 1950 -جىلدارداعى الەم بىرىنشىلىگىنە قاتىسۋدان باس تارتقان. يتاليا مەن ارگەنتينا قۇرامالارى ءبىر-ءبىر مارتە ىرىكتەۋ كەزەڭىنەن وتە العان جوق.

الەم بىرىنشىلىگىندەگى ەڭ جىلدام سوعىلعان گول 2002 الەم بىرىنشىلىگىندە تىركەلدى. ويىننىڭ 10,8 سەكۋندىندا تۇركيا شابۋىلشىسى حاكان شۇكىر ءوز قۇراماسىن العا شىعاردى.

الەم بىرىنشىلىگىنىڭ ەڭ ۇزدىك سۇرمەرگەنى اتاعى گەرمانيا ويىنشىسى ميروسلاۆ كلوزەنىڭ (16 گول) ەنشىسىندە تۇر.

 

 ءادىلجان ۇمبەت