سوڭعى جەكپە-جەگىمدە 200 مىڭ دوللاردان استام قارجى تاپتىم - شاۆكات راحمونوۆ

استانا. قازاقپارات - تاياۋدا عانا لاس-ۆەگاستا وتكەن UFC 285 ارالاس جەكپە-جەك باسەكەسىندە جەڭىسكە جەتكەن وتانداسىمىز شاۆكات راحمونوۆ Jibek Joly تەلەارناسىنداعى «تۇنگى ستۋديا» نۇرلان قويانبايەۆپەن باعدارلاماسىندا قوناق بولدى، دەپ حابارلايدى قازاقپارات ءتىلشىسى.

«بۇل مەنىڭ عانا ەمەس بۇكىل قازاق حالقىنىڭ جەڭىسى. جەڭىسكە جەتكەنىمە حالقىم قۋانىپ جاتىر. امەريكادا قازاقتىڭ كوك تۋىن جەلبىرەتۋ، قازاق تىلىندە ءسوز سويلەۋ مەن ءۇشىن ۇلكەن باقىت ءارى شابىتتاندىرادى. ارمانىم - UFC بەلبەۋىن قازاقستانعا اكەلۋ. قۇداي بۇيىرتسا ونى دا ەلگە اكەلەمىز. سوڭعى قارسىلاسىم UFC- ءدىڭ ۇزدىك وندىعىنا كىرگەن دجەفف نيل بولدى. شىنىن ايتۋ كەرەك، جەكپە-جەك بارىسىندا ەكەۋىسىز دە شارشادىق، ول دا، مەن دە سوققى وتكىزدىك. تارتىستى جەكپە-جەك بولدى. ناتيجەسىندە قىلقىندىرۋ ادىسىمەن جەڭدىم. ونى جەكپە-جەككە شاقىرعانىمدا «جەڭەمىن» دەپ ويلاعان سياقتى. ءبىراق، قاتەلەستى. ءقازىر مەن الەم بويىنشا UFC- ءدىڭ ۇزدىك وندىعىندا 6-ورىندا تۇرمىن»، - دەدى سپورتشى باعدارلاما بارىسىندا.

سونىمەن قاتار ول جەكپە-جەكتەردەگى جەڭىسى ءۇشىن باعالى سىيلىق تارتۋ ەتكەن ازاماتتاردىڭ بولعانىن اتاپ ءوتتى.

«سىيلاماسا دا ريزامىز، شىن جۇرەكتەن قولداۋ بىلدىرسە بولعانى. بىرەۋدەن سىيلىق كۇتپەيمىز، سپورتتا ول ءۇشىن جۇرگەنىمىز جوق. تاپقان تابىسىمىز دا جەتەدى. بىزدەن گورى جاستارىمىزعا قولداۋ بىلدىرسە دۇرىس بولار ەدى. تابىسىمىز وزىمىزگە جەتەدى. سوڭعى جەكپە- جەگىمدە تاپقان تابىسىم 200 مىڭ دوللاردان اسادى. قولىمىزدان كەلگەنشە اقشانى سىرتقا شىعارماي ەلگە اكەلىپ جاتىرمىز»، - دەدى شاۆكات راحمونوۆ.

شاۆكات راحمونوۆ جاس سپورتشىلارعا دا ءوزىنىڭ اقىل-كەڭەسىن بەردى.

«رەجيم ساقتاپ، اسىقپاڭىزدار. اسىققان كەزدە قاتەلىكتەر ورىن الۋى مۇمكىن. ەش ۋاقىتتا اسىقتاي كۇتىڭىزدەر. كۇتە بىلىڭىزدەر، شىدام دا بولۋى كەرەك»، - دەدى سپورتشى.

ايتا كەتەيىك، 5- ناۋرىزدا شاۆكات راحمونوۆ امەريكالىق بەلگىلى فايتەر دجەفف نيلدى (15-4) ءۇشىنشى راۋندتا ونى قىلقىندىرۋ ادىسىمەن جەڭگەن بولاتىن.