ەلورداداعى كاراوكە باردا تۇندە 200 ادام جۇرگەن

نۇر- سۇلتان. قازاقپارات - ەلوردانىڭ تاۋارلار مەن كورسەتىلەتىن قىزمەتتەردىڭ ساپاسىن قاداعالاۋ باسقارماسى، اكىمدىك قىزمەتكەرلەرى، ەرىكتىلەر جانە پوليتسەيلەردەن قۇرىلعان مونيتورينگ توپتارى كارانتين رەجيمىن ساقتاۋعا قاتىستى رەيد وتكىزدى، دەپ حابارلايدى قازاقپارات قالالىق پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

قالا تۇرعىندارى ءبىرقاتار شەكتەۋ شارالارى بەلگىلەنگەن قولدانىستاعى قاۋلىعا قاراماستان كوڭىل كوتەرۋ مەكەمەلەرىنە بارۋدان باس تارتپاي وتىر. دەمالىس كۇندەرى پوليتسيا دەپارتامەنتى بولىمشەلەرىنىڭ قىزمەتكەرلەرى قالاداعى تاۋارلار مەن كورسەتىلەتىن قىزمەت ساپاسىن قاداعالاۋ باسقارماسىنىڭ قىزمەتكەرلەرىمەن بىرلەسىپ، 95 كاسىپكەرلىك نىسانىن تەكسەرىپ، 12 كارانتين رەجيمىن بۇزعان فاكتىنى انىقتادى.

وسىلايشا، كەشە ساعات 22:30-دا ءموبيلدى توپتار «چتو بۋدەت دالشە؟» كاراوكە بارىنىڭ جۇمىس كەستەسىن ساقتاماي، كەلۋشىلەردى قابىلداۋ فاكتىسىن انىقتادى. باردىڭ ىشىندە 200 ادام بولعان. كوڭىل كوتەرىپ جۇرگەن جاستار ماسكا تاقپاي، الەۋمەتتىك قاشىقتى مۇلدەم ۇمىتقان. كارانتين رەجيمىن تەك ويىن- ساۋىق مەكەمەلەرىنىڭ يەلەرى عانا بۇزىپ جۇرگەن جوق. تۇنگى رەيد بارىسىندا ءموبيلدى توپ تىيىم سالىنعان ۋاقىتتا جۇمىس ىستەپ تۇرعان كومپيۋتەر كلۋبتارى مەن دۇكەندەردى انىقتادى.

كارانتين رەجيمىن ساقتاماۋشىلارعا قاتىستى جينالعان ماتەريال ق ر اكىمشىلىك قۇقىقبۇزۋشىلىقتار تۋرالى كودەكستىڭ 425-بابى بويىنشا تاۋارلار مەن كورسەتىلەتىن قىزمەت ساپاسىن قاداعالاۋ باسقارماسىنا جىبەرىلدى. قالالىق پوليسيا دەپارتامەنتى كارانتين ءتارتىبىن بۇزۋشىلار قازىرگى زاڭناماعا سايكەس جاۋاپقا تارتىلاتىنىن ەسكەرتىپ وتىر.