باتىس قازاقستاندا 200 گە جۋىق بالا كوروناۆيرۋس جۇقتىرعان
وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتى ءمالىم ەتكەنىندەي، سونىڭ ىشىندە قىركۇيەك ايىندا - 4، قازاندا - 5، قاراشادا - 102، جەلتوقساندا 71 بالادان ىندەت انىقتالدى.
وعان قوسا 15 بالاباقشا تاربيەلەنۋشىسىنىڭ 12 سىنەن قاراشادا، ۇشەۋىنەن جەلتوقساندا كوروناۆيرۋس تابىلعان. بالالاردىڭ ءبارى دە سىرقاتتى وتباسى مۇشەلەرىنەن جۇقتىرعان.
ب ق و سانيتارلىق-ەپيدەميولوگيالىق باقىلاۋ دەپارتامەنتىنىڭ باسپا ءسوز قىزمەتىنەن تۇسكەن مالىمەتكە قاراعاندا، وڭىردە احۋال قاراشا ايىنان بەرى تۇراقسىز بولىپ وتىر.
1-28- جەلتوقسان ارالىعىندا ىندەت جۇقتىرعاندار سانى 1042 گە جەتتى. جەلتوقسان ايىندا مەملەكەتتىك شەكارادان 28473 ادام وتسە، سونىڭ 4933 ءى - جولاۋشىلار. انىقتاماسى جوق 842 جولاۋشىنىڭ تورتەۋىنەن كوۆيد تابىلدى. سول سەكىلدى حالىقارالىق جۇك تاسىمالىمەن اينالىساتىن 14337 جۇرگىزۋشىنىڭ 4833 ىندە انىقتاما بولماعان. بۇلاردىڭ 9 ىنىڭ ىندەتكە شالدىققانى بەلگىلى بولدى.
ەسكە سالا كەتەيىك، بۇدان بۇرىن ورالدا جاڭا جىل قارساڭىندا كوڭىل كوتەرۋ ورىندارىندا باقىلاۋ كۇشەيتىلگەنىن، قاراشىعاناق كەنىشىندە ءبىر ايدا 82 ادامنان كوروناۆيرۋس تابىلعانىن جازعان بولاتىنبىز.