تەكسەرۋگە كەدەرگى جاساعانى ءۇشىن «استانا» ۋنيۆەرسيتەتى 200 ا ە ك كولەمىندە ايىپپۇل تولەيدى

None
None
نۇر- سۇلتان. قازاقپارات - «استانا» ۋنيۆەرسيتەتى تەكسەرۋ جۇرگىزۋگە كەدەرگى جاساعانى ءۇشىن اكىمشىلىك جاۋاپقا تارتىلدى جانە 200 ا ە ك (555600 تەڭگە) ايىپپۇل تولەيدى، دەپ حابارلايدى قازاقپارات ءتىلشىسى.

بۇل تۋرالى ق ر ءبىلىم جانە عىلىم مينيسترلىگى ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ ءتوراعاسى گۇلزات كوبەنوۆا ايتىپ بەردى.

«استانا» ۋنيۆەرسيتەتىندە تەكسەرۋ جۇرگىزۋگە ءبىر جىلدا ەكى رەت ارەكەت جاسالدى. ستۋدەنتتەردىڭ ءوتىنىشى نەگىزىندە تەكسەرۋ تىركەلدى. كوميسسيا تەكسەرۋگە شىقتى. الايدا ۋنيۆەرسيتەت تاراپىنان عيماراتقا كىرۋگە كەدەرگى جاسالدى. كەدەرگى جاساۋ بويىنشا سوت پروتسەسى بۇگىنگى كۇنى اياقتالدى. ۋنيۆەرسيتەت اكىمشىلىك ايىپپۇل تۇرىندە اكىمشىلىك جاۋاپقا تارتىلدى»، - دەدى كوميتەت باسشىسى ورتالىق كوممۋنيكاتسيالار قىزمەتىندە وتكەن بريفينگتە.

ونىڭ ايتۋىنشا، ەكىنشى تەكسەرۋ بيىلعى كوكتەمدە پروفيلاكتيكالىق باقىلاۋ رەتىندە جوسپارلى نەگىزدە ءوتۋى ءتيىس ەدى. الايدا، ۋنيۆەرسيتەت قاجەتتى قۇجاتتاردى بەرمەي، تەكسەرۋگە كەدەرگى كەلتىردى. وندا دا ۋنيۆەرسيتەت اكىمشىلىك جاۋاپقا تارتىلعان.

«وسىعان بايلانىستى ۋنيۆەرسيتەتتە ەشقانداي تەكسەرۋ جۇرگىزىلگەن جوق. ءبىراق وسى ۋنيۆەرسيتەتتىڭ بيىلعى تۇلەكتەرى ديپلومدارىن ۋاقىتىلى الا المادى. سەبەبى ۋنيۆەرسيتەت بيىلعى تامىز ايىندا عانا اككرەديتاتسيادان وتكەن. تيىسىنشە، تۇلەكتەر ماگيستراتۋراعا تۇسە المادى، بىردەن جۇمىسقا ورنالاسا المادى»، - دەدى گ. كوبەنوۆا.

قىركۇيەك ايىندا ق ر ءبىلىم جانە عىلىم مينيسترلىگى «استانا» ۋنيۆەرسيتەتىنە جوسپاردان تىس تەكسەرۋدى باستاعان ەدى، وعان 14 ستۋدەنتتىڭ شاعىمى نەگىز بولدى.

اۆتور: ايجان سەرىكجان قىزى

سوڭعى جاڭالىقتار