16:05, 28 - مامىر 2020 | GMT +6
جاڭا ايفوندى 200 مىڭ تەڭگەدەن ۇسىنعان استانالىق ۇستالدى
نۇر-سۇلتان. قازاقپارات - قۇقىق قورعاۋ ورگاندارى iPhone تەلەفونىن 200 مىڭ تەڭگەدەن ساتامىن دەپ الداعان ەلوردانىڭ 23 جاستاعى تۇرعىنىن ۇستادى، - دەپ حابارلايدى نۇر-سۇلتان پوليتسيا دەپارتامەنتىنىڭ باسپا ءسوز قىزمەتى.
«جاس جىگىت الەۋمەتتىك جەلىدە فەيك اككاۋنت اشىپ، برەند تەلەفونداردى تومەن باعادا ساتامىن دەپ ۇسىنعان. مىسالى iPhone سوڭعى ۇلگىسىن 200000 تەڭگەگە ۇسىنعان. ونىڭ نەگىزگى باعاسى الدەقايدا جوعارى. ەكى ادام الاياققا الدانىپ قالعان. ولار تەلەفوننىڭ اقىسىن جانە ۇيگە جەتكىزۋى ءۇشىن اقشانى ەلەكترون ءاميانعا اۋدارعان»، - دەپ مالىمدەدى پوليتسياداعىلار.
23 جاستاعى كۇدىكتى جىگىتتىڭ باسقا ۇقساس قىلمىستارعا قاتىسى بار-جوعى تەكسەرىلىپ جاتىر.
پوليتسيانىڭ دەرەكتەرىنە سۇيەنسەك، جىل باسىنان بەرى نۇر-سۇلتاندا 620 ينتەرنەت-الاياقتىق تىركەلگەن. ولاردىڭ 80 پايىزى ونلاين-ساتىلىمعا قاتىستى ەكەن.