ماقتاارالعا كومەككە 200 وزبەكستان ازاماتى مەن ارنايى تەحنيكالار كەلىپ جەتتى

None
None
ماقتاارال. قازاقپارات - سۋ تاسقىنى بولعان ماقتاارال اۋدانىنا كومەككە وزبەكستان ازاماتتارى مەن ارنايى تەحنيكالار كەلىپ جەتتى.

بۇل تۋرالى وڭىرلىك اكىمدىك قىزمەتكەرلەرى Facebook پاراقشاسىندا جاريا ەتتى، دەپ حابارلايدى قازاقپارات ءتىلشىسى.

اپات بولعان ايماقتاعى جەدەل شتابتىڭ اقپاراتتىق ءبولىمى مامانى قانات بايسوۆتىڭ ايتۋىنشا، كورشى ەلدەن 42 ارنايى تەحنيكا مەن 200 ادام كەلگەن. تەحنيكالاردىڭ اراسىندا سۋ سورعىش، بۋلدوزەر جانە بوگەت سالۋعا قاجەتتى تۇرلەرى بار. سونداي- اق وزبەكستاندىق جاساق ەلدى مەكەندەرگە جايىلعان سۋدى تازالاۋ مەن سۋ سورۋ جۇمىستارىن جۇرگىزبەك. سونىمەن قاتار تۇرعىن ۇيلەردىڭ قۇرىلىسىنا دا اتسالىسادى. جۇمىسشىلار وزدەرىمەن بىرگە اس- اۋقاتى مەن جانار- جاعارمايىن دا الا كەلىپتى. ولار مۇنىڭ ءبارى وزبەكستان پرەزيدەنتى شاۆكات ميرزيە يەۆتىڭ تاپسىرماسىنا ساي اتقارىلىپ جاتقان شارا ەكەنىن جەتكىزگەن. شەتەلدىك كومەكشىلەر ەرتەڭگى كۇنى تاعى تۇرعىن ۇيلەردىڭ قۇرىلىس جۇمىستارىنا قوسىمشا جۇمىسشىلار كەلەتىنىن جانە قاجەتتى قۇرىلىس ماتەريالدار جەتكىزىلەتىنىن ءمالىم ەتكەن. ايتا كەتەيىك، بۇعان دەيىن وبلىس اكىمى ءومىرزاق شوكەيەۆ ءبىرقاتار ماماندارمەن وزبەك ەلىنە بارىپ، سۋ تاسقىنى ماسەلەسى بويىنشا كەلىسسوزدەر جۇرگىزگەن بولاتىن. ال، كۇنى كەشە وزبەكستان رەسپۋبليكاسىنىڭ پرەزيدەنتى شاۆكات ميرزيە يەۆ «كورشى ماقتاارال اۋدانىن سۋ شايىپ كەتكەنىن جانە اپات سالدارىن جويۋعا كومەكتەسەمىز» دەپ ۋادە بەرگەن ەدى.

سوڭعى جاڭالىقتار