قازاقستاندىقتاردىڭ ورتاشا ايلىعى 200 مىڭ تەڭگەدەن استى - زەرتتەۋ

نۇر-سۇلتان. قازاقپارات - Finprom قازاقستان ازاماتتارىنىڭ ايلىق تابىسىنا قاتىستى جاسالعان تالداۋ قورىتىندىسىن ۇسىندى، دەپ حابارلايدى قازاقپارات ءتىلشىسى.

Finprom جۇرگىزگەن تالداۋعا سەنسەك، قازاقستاندىقتاردىڭ ورتاشا ايلىق جالاقىسى وتكەن جىلدىڭ سوڭعى توقسانىندا العاش رەت 200 مىڭ تەڭگەدەن اسىپ، ساتىپ الۋ قابىلەتى شامامەن 10 پايىزعا كوتەرىلگەن. دەسە دە اۋىل شارۋاشىلىعى، ءبىلىم مەن دەنساۋلىق ساقتاۋ سالاسىندا ەڭبەك ەتىپ جۇرگەندەردىڭ ايلىعى ءالى دە تومەنگى قالىپتا ساقتالىپ وتىر.

«2019-جىلدىڭ سوڭعى توقسانىندا قازاقستاندىقتاردىڭ ايلىعى 203,9 مىڭ تەڭگەنى قۇراپ، ونىڭ الدىڭعى جىلداعى كورسەتكىشتەن 15,8 پايىزدىق ءوسىمدى كورسەتتى. ينفلياتسيانى ەسكەرە وتىرىپ، ايلىق تولەمنىڭ ساتىپ الۋ قابىلەتىنىڭ شىنايى ءوسىمى 9,9 پايىزدى قۇرادى. ايلىقتىڭ ەڭ جوعارى مولشەرىن مۇنايلى ەكى وبلىس پەن نۇر-سۇلتان، الماتى قالالارىنىڭ تۇرعىندارى الادى. قالعان وڭىرلەردەگى كورسەتكىش رەسپۋبليكالىق ورتاشا دەڭگەيدەن تومەن»، - دەلىنگەن حابارلامادا.

Finprom مالىمەتىنە ساي، ورتاشا ايلىق اتىراۋ وبلىسىندا 345,2 مىڭ تەڭگەگە جەتىپ، ءبىر جىل بۇرىنعى كورسەتكىشتەن 7,5 پايىزعا (1,6 پايىزدىق ينفلياتسيانى ەسكەرە وتىرىپ) وسكەن. ەكىنشى ورىندا 309,1 مىڭ تەڭگە جالاقىمەن ماڭعىستاۋ وبلىسى ء(وسىم 10,9 پايىز) تۇر.

«نۇر-سۇلتاندا ايلىق 308,1 مىڭ تەڭگەمەن بىردەن 15,1 پايىزدىق وسىمگە جەتتى. ەلوردادا ساتىپ الۋ قابىلەتى 8,9 پايىزعا كوتەرىلدى. ال الماتىدا ايلىق دەڭگەيى 248,7 مىڭ تەڭگەمەن 12,4 پايىزعا كوتەرىلدى (6,9 پايىزدىق ينفلياتسيانى ەسەپكە العاندا)»، - دەلىنگەن سايتتا.

سونىمەن قاتار، ەڭبەكاقىنىڭ ورتاشا دەڭگەيىنىڭ كوتەرىلۋى ب ق و (%18,5) ، شىمكەنت (%17,3) جانە الماتى وبلىسىندا (%16,4) بايقالعان. ال بارىنەن از ايلىقتى اگرارلىق وڭىرلەر قاتارىنداعى تۇركىستان (138,1 مىڭ تەڭگە) جانە جامبىل وبلىسىنىڭ (140 مىڭ تەڭگە) تۇرعىندارى الادى.

ەلدەگى ەڭ ۇلكەن ايلىق الىپ وتىرعان ماماندىق يەلەرى - قارجى جانە ساقتاندىرۋ سالاسىنىڭ قىزمەتكەرلەرى (402,5 مىڭ تەڭگە). سونداي-اق ەڭ كوپ تابىس تاباتىن سالانىڭ ۇشتىگىنە عىلىمي-تەحنيكالىق سالا (373,4 مىڭ تەڭگە)، ءوندىرىس سەكتورى (280 مىڭ تەڭگە) كىرەدى.