+7 (701) 759 90 19
-1 °С : نۇر-سۇلتان
7 °С : الماتى
USD 381.10 EUR 420.81
RUB 5.65 CNY 54.57
جاڭالىقتار

ەلەنا پاك ابايدىڭ 200 گە جۋىق ولەڭىن جاتقا بىلەدى

20 قاڭتار 17:25
:ءبولىسۋ
ەلەنا پاك ابايدىڭ 200 گە جۋىق ولەڭىن جاتقا بىلەدى

قىزىلوردا. قازاقپارات - قىزىلوردالىق ستۋدەنت ەلەنا پاك قازاقتىڭ ۇلى ويشىلى ابايدىڭ ولەڭدەرىن جاتقا بىلەدى. الاشتىڭ ارداقتى تۇلعاسىنىڭ شىعارماشىلىعىنا ەرەكشە قىزىعۋشىلىق تانىتقان جاس كوپتەگەن بايقاۋدا جەڭىمپازدار قاتارىنا كورىندى، دەپ حابارلايدى قازاقپارات ءتىلشىسى.

ەلەنا 2001 -جىلى شيەلى اۋدانىنا قاراستى اقمايا اۋىلىندا دۇنيەگە كەلگەن. اقمايادا كوپتەگەن ۇلت وكىلدەرى تاتۋ- ءتاتتى عۇمىر كەشىپ وتىر. سولاردىڭ قاتارىندا پاك اۋلەتى دە بار. ۇزاق ۋاقىتتان بەرى وىس اۋىلدا تۇراتىن بۇل اۋلەت جەرگىلىكتى جۇرتپەن ەتەنە ارالاسىپ، ەلدەگى اعايىنمەن دوس- باۋىرداي بولىپ كەتتى. بەرەكە مەن بىرلىك ۇيا سالعان شۋاقتى شاڭىراقتاعى بارلىق ادام قازاق ءتىلىن جەتىك بىلەدى. حالقىمىزدىڭ ماقال- ماتەلىن، بەينەلى سوزدەرىن، وزگە دە ەرەكشەلىگىن ءبىر كىسىدەي تۇسىنەدى.


«كەزىندە اتام ۆيتالي پاك اۋىلدا كۇرىششى بولىپ ەڭبەك ەتسە، اجەم سۆەتلانا ليان ەسەپشى قىزمەتىن اتقاردى. قازىر ەكەۋى دە زەينەتكەر. اكەم ۆلاديمير مەن انام تاتيانا دا سول قۇتتى قونىستا تۇراق تاپتى، بۇگىندە «اقمايا» شارۋاشىلىعىندا نەسىبەسىن تەرىپ ءجۇر. وتباسىندا ءۇش بالامىز. ۇلكەنى - مەنمىن، ءىنىم ۆيتالي دە قازاق اقىن- جازۋشىلارىنىڭ شىعارمالارىنا قىزىعادى. ول دا ابايدىڭ ءبىرشاما ولەڭىن جاتقا بىلەدى. بيىل ەلىمىزدە كەمەڭگەر تۇلعانىڭ 175 جىلدىعىن كەڭىنەن اتاپ ءوتۋ جوسپارلانىپ وتىر. ءبىز مەرەيتوي بارىسىندا زەردەمىزگە تاعىلىمدى وي تۇيەرىمىز ءسوزسىز»، - دەدى ەلەنا.

ول اۋىلدا قازاق مەكتەبىندە ءبىلىم الدى. ەس بىلگەننەن سول تىلدە سويلەگەن جاس ورەن ءبىلىم ۇياسىندا ەشبىر قيىندىق كورگەن جوق. كۇندە وزىمەن ويناپ جۇرگەن دوستارى سەكىلدى ءاربىر ساباقتا ءوزىنىڭ قابىلەتىن كورسەتىپ، زەردەسىنە توقىعان دۇنيەلەردى ۇستازىنا ەمىن- ەركىن جەتكىزە الاتىن. اجەسى سۆەتلانا نەمەرەسىنىڭ قولىنان جەتەكتەپ قازاق مەكتەبىنە الىپ بارعان ەدى. تاۋەلسىز ەلىمىزدىڭ ەرتەڭى - قازاق تىلىندە ەكەنىن جەتە تۇسىنگەن شاڭىراق يەلەرى قاريانىڭ ورايلى پىكىرىنە ەشبىر قارسى بولعان جوق. بىلىمگە قۇشتار جەتكىنشەك وسىلايشا ۇلان- عايىر دالانىڭ تەرەڭنەن تارتقان تاريحىنا بويلاپ، قانشاما تولىمدى تۋىندى، جىر مارجانىمەن سۋسىنداپ ءوستى. دارحان دالانىڭ داناسى اباي ولەڭدەرىنە دەگەن قىزىعۋشىلىق تا سول مەكتەپ قابىرعاسىندا جۇرگەندە وياندى.


«توعىزىنشى سىنىپتا وقىپ جۇرگەن كەزىم ەدى. ەڭ العاش اباي اتامىزدىڭ ولەڭدەرىنە دەگەن قىزىعۋشىلىعىمدى وياتقان ۇستازىم بيبىگۇل سۇلتانوۆا ماعان «اباي وقۋلارى» بايقاۋى بولاتىنىن ايتتى. سوعان قاتىسۋعا شاقىردى. مەن ودان ەشبىر جۇرەكسىنگەن جوقپىن. ازىرلىك جاساۋدى باستاپ كەتتىك. باس- اياعى ءۇش- ايدىڭ كولەمىندە ابايدىڭ 80-گە تارتا ولەڭىن جاتتادىم. اۋداندىق بايقاۋدا ەڭبەگىم جوعارى باعالانىپ، ءبىرىنشى ورىن يەگەرى اتاندىم. ودان كەيىن وبلىستىق بايقاۋعا دەيىن ۇلى اقىننىڭ «ەسكەندىر» پوەماسىن جاتتاپ الدىم. ۇستازىم ەكەۋمىز ول بايقاۋدان دا ابىرويلى ورالدىق»، - دەيدى ەلەنا.

بۇگىنگى كۇندەرى ەلەنا قورقىت اتا اتىنداعى قىزىلوردا مەملەكەتتىك ۋنيۆەرسيتەتىندە فيلولوگ ماماندىعى بويىنشا ەكىنشى كۋرستا وقيدى. زەرەك قىز ءتىل ءبىلىمىنىڭ قىر- سىرىنا قانىعا تۇسۋگە ىنتا جاساپ وتىر. ءاربىر ءتىلدى جەتە زەرتتەي بىلسەڭ، سول ۇلتتىڭ بۇكىل بولمىس- ءبىتىمىن زەردەلەۋگە ابدەن بولاتىنىن ايتادى.

ول كوپتەگەن قوعامدىق شارالارعا بەلسەنە قاتىسىپ كەلەدى. وعان قازاق ءتىلىن جاقسى بىلەتىندىگى كوپ كومەكتەسەدى.

دوستىق پەن بىرلىك ۇلت تاڭدامايدى. سوناۋ ءبىر الاساپىران جىلداردا قازاق توپىراعىنا قانشاما ۇلت پەن ۇلىس قادام باستى. قادىم زاماننان قانىمىزعا سىڭگەن قالپىمىزدى ساقتاپ، تاعدىر جازۋىمەن ءبىزدىڭ جەرگە كەلگەن تالاي جان كەڭپەيىل نيەتىمىزدىڭ شۋاعىنان قۋات الدى. قازىرگى تاڭدا ەگەمەن ەلىمىزدىڭ ەڭسەسىن تىكتەتۋگە ولار دا بىزبەن بىرگە قال- قادەرىنشە ۇلەسىن قوسىپ كەلەدى. جەرگىلىكتى حالىقتىڭ ءتىلى مەن ءدىلىن بويىنا ءسىڭىرىپ، ولارمەن تۋىس- باۋىر سەكىلدى ەتەنە ارالاسىپ كەتتى.

اۆتور ءادىلجان ۇمبەت



:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات