قىزىلوردالىق وقۋشى ابايدىڭ 200 دەن استام شىعارماسىن جاتقا بىلەدى

None
None
قىزىلوردا. قازاقپارات - قىزىلوردالىق وقۋشى نۇراي ءومىرزاقوۆا قازاقتىڭ كەمەڭگەر تۇلعاسى - ابايدىڭ 200 دەن استام ولەڭىن جاتقا بىلەدى، دەپ حابارلايدى قازاقپارات ءتىلشىسى.

بۇگىندە ول قىزىلوردا قالاسىنداعى نازاربايەۆ زياتكەرلىك مەكتەبىندە ونىنشى سىنىپتا ءتالىم الادى. اباي شىعارمالارىنا العاش ءۇشىنشى سىنىپتا قىزىعۋشىلىق تانىتقان ەكەن. سول ۋاقىتتا اتا-اناسى وعان مۇحتار اۋەزوۆتىڭ «اباي جولى» رومان- ەپوپەياسىن وقۋعا كەڭەس بەرەدى. سودان بەرى نۇرايدىڭ اباي شىعارمالارىنا دەگەن قىزىعۋشىلىعى ارتا تۇسەدى. اقىننىڭ ءومىرى مەن شىعارماشىلىعىن بىلۋگە قۇلشىنا كىرىسەدى.

«تاريحي شىعارما مەنى وزىنە ەرەكشە باۋراي ءتۇستى. سوڭىنا دەيىن باس الماي وقىپ شىقتىم. وندا ايتىلعان ورىنداردى، تاريحي قونىستاردى كوزىممەن كورۋگە تالپىندىم. بەسىنشى سىنىپ وقىپ جۇرگەندە «اباي وقۋلارى» دەگەن بايقاۋدىڭ بولاتىنىن ەستىدىم. سوعان قاتىسۋعا شەشىم قابىلدادىم. ادەبيەت پانىنەن ءدارىس بەرەتىن ۇستازىم بۇل نيەتىمدى قۇپ كوردى. بايقاۋدا جەڭگەن جۇلدەگەر ابايدىڭ دۇنيەگە كەلگەن توپىراعى - سەمەي وڭىرىنە بارۋعا مۇمكىندىك الاتىنىن جەتكىزدى»، - دەيدى نۇراي.

وسىلايشا، ول بايقاۋعا قاتىسۋعا بەلسەنە كىرىستى. ەكى ايدىڭ ىشىندە ۇلى اقىننىڭ 150 گە جۋىق شىعارماسىن زەردەسىنە توقىپ ۇلگەردى. ەڭبەگى ەش كەتكەن جوق. اۋداندىق جانە وبلىستىق بايقاۋدا جەڭىمپاز اتاندى. ءتورت ايدان كەيىن رەسپۋبليكالىق بايقاۋدا ابايدىڭ 200 دەن استام جانە شاكارىمنىڭ 60 تان استام ولەڭىن زەردەسىنە توقىپ، ءبىلىم بايگەسىندە ديپلومانت اتاندى. ناتيجەسىندە اقىننىڭ دۇنيەگە كەلگەن توپىراعىندا تاريحي ورىنداردى ارالاپ قايتۋعا مۇمكىندىك الدى.

بۇگىندە نۇراي ساباقتان قولى بوس ۋاقىتتا اباي شىعارمالارىنا زەر سالعاندى جانى ۇناتادى. قازاقتىڭ كەمەڭگەر تۇلعاسىنىڭ قيالىنان تۋعان ءاربىر دۇنيە حالقىمىزعا ورامدى وي سالاتىنى انىق. دالا دانىشپانى زامانا تىنىسىن تاپ باسىپ، قوعامنىڭ وزەكتى ماسەلەسىن حالىقتىڭ تالقىسىنا سالادى. بۇل - ءاربىر قازاق ءۇشىن باستى تالاپ. كەمشىلىگىن تۇزەپ، العا قادام باسۋدىڭ العىشارتى رەتىندە ساناۋ ارتىق ەمەس. نۇراي جاس تا بولسا اقىن شىعارماشىلىعىنان سونداي وي ءتۇيىپ، وندا ايتىلعان سان الۋان پىكىردى تالعام تارازىسىنا تارتا بىلەدى.

نۇراي كەلەشەكتە نەيروحيرۋرگ بولۋدى الدىنا ماقسات ەتىپ وتىر. ەلىمىزدىڭ مەديتسينا سالاسىندا جوعارى دەڭگەيدەگى بىلىكتى مامان بولۋدى ارماندايدى. بۇگىندە سول ماقساتتا ءبىلىمىن تولىقتىرىپ، ۇلكەن ىزدەنىس جاساپ كەلەدى.

سوڭعى جاڭالىقتار