شاعىن بيزنەستى سالىقتان بوساتقاننان كەيىن ەل بيۋجەتى 200 ميلليارد تەڭگەدەن قاعىلادى

None
None
نۇر-سۇلتان. قازاقپارات - ميكرو جانە شاعىن بيزنەستى سالىقتان بوساتقاننان كەيىن ەل بيۋجەتى 200 ميلليارد تەڭگەدەن قاعىلادى.

بۇل تۋرالى بۇگىن ق ر پرەمەر-ءمينيسترىنىڭ ءبىرىنشى ورىنباسارى - قارجى ءمينيسترى ءاليحان سمايىلوۆ ايتتى، دەپ حابارلايدى قازاقپارات ءتىلشىسى.

«مەملەكەت باسشىسى جولداۋىندا ميكرو جانە شاعىن بيزنەس سۋبەكتىلەرىنىڭ بارلىق كاسىپورىندارىن تابىس سالىعىنان بوساتۋ تۋرالى تاپسىرما بەرگەن بولاتىن. ميكرو بيزنەس دەگەنىمىز سالىق زاڭناماسىنا سايكەس 15 ادام جۇمىس ىستەيتىن جانە جىلدىق تابىسى 30 ا ە ك- ءتى قۇرايتىن نەمەسە جىلىنا شامامەن 76 ميلليون تەڭگە بولاتىن جەكە كاسىپكەرلەر، زاڭدى تۇلعالار»، - دەدى ول ۇكىمەت وتىرىسىنان كەيىن ب ا ق وكىلدەرىنە بەرگەن سۇحباتىندا.

ال ونىڭ ايتۋىنشا، شاعىن بيزنەسكە 100 ادامعا دەيىن جۇمىسشىسى بار جانە جىلدىق تابىسى 300 ا ە ك- كە دەيىنگى ۇيىمدار كىرەدى.

«بۇل ۇيىمدار مەن جەكە ۇيىمدار تابىس سالىعىنان بوساتىلادى. ولار جەكە تابىس سالىعى مەن كورپوراتيۆتىك تابىس سالىعى. تولىقتاي العاندا، وتكەن جىلى ميكرو جانە شاعىن بيزنەستەن بيۋجەتكە مۇنداي تابىس سالىعى شامامەن 190 ميلليارد تەڭگە مولشەرىندە تۇسكەن بولاتىن. ەگەر ءبىز مۇنداي كومپانيالار مەن جەكە كاسىپكەرلەردى اتالعان سالىقتاردان بوساتاتىن بولساق، وندا 2020-جىلى بيۋجەت شىعىنى 200 ميلليارد تەڭگەدەن استام سومانى قۇرايدى. دەگەنمەن، بۇل شىعىنداردى سالىقتىق، كەدەندىك اكىمشىلەۋدى جاقسارتۋ ەسەبىنەن قايتارۋدى جوسپارلاپ وتىرمىز»، - دەدى ءا. سمايىلوۆ.

سوڭعى جاڭالىقتار