سولتۇستىك قازاقستان جاستار كاسىپكەرلىگىن دامىتۋعا 200 ميلليون تەڭگە بولەدى

پەتروپاۆل. قازاقپارات - سولتۇستىك قازاقستان وبلىسىنىڭ اكىمى قۇمار اقساقالوۆ جاستارمەن بەيرەسمي كەزدەسىپ، ولاردىڭ يدەيالارى مەن ۇسىنىستارىن تىڭدادى، دەپ حابارلايدى قازاقپارات ءتىلشىسى.

س ق و اكىمى باسپا ءسوز قىزمەتىنىڭ حابارلاۋىنشا، ءوڭىر باسشىسىمەن كەزدەسۋگە وبلىستىڭ قوعامدىق ومىرىنە بەلسەندى اتسالىسىپ جۇرگەن جاستار كەلدى. ەڭ ىسكەر، بەلگىلى ءبىر جەتىستىككە جەتىپ ۇلگەرگەن، شىعارماشىل، كرەاتيۆتى جانە سپورتتا ۇزدىك جاستار وي- پىكىرلەرىمەن، بولاشاققا جوسپارلارىمەن جانە ۇسىنىستارىمەن ءبولىستى. قۇمار اقساقالوۆ جاستاردى كاسىپكەرلىكپەن اينالىسۋعا شاقىرىپ، مەملەكەت تاراپىنان جاسالاتىن قولداۋلار تۋرالى ايتتى.

«دامۋ» قورىمەن بىرىگە وتىرا، جاستار كاسىپكەرلىگىن ودان ءارى دامىتۋ كەرەك. ءبىز كەلەسى جىلى بۇل باعىتقا 200 ميلليون تەڭگە بولۋگە دايىنبىز. جاستاردى «قاراپايىم زاتتار» ەكونوميكاسى سالاسى بويىنشا بيزنەس باستاۋعا شاقىرامىن. ال، ولاردى وقىتۋعا تاجىريبەلى كاسىپكەرلەردى تارتۋ كەرەك. وقۋ ورىندارىندا بيزنەسمەندەر وزدەرىنىڭ تاجىريبەلەرىمەن بولىسەدى. وقۋشىلار سارايى قابىرعاسىندا پيتچينگتەر ۇيىمداستىرىپ، ول جەردە جاستار وزدەرىنىڭ بيزنەس- يدەيالارىمەن بولىسەدى. كاسىپكەرلەر ولاردىڭ جوباسىن بىرلەسە جۇزەگە اسىراتىن بولادى»، - دەدى قۇمار اقساقالوۆ.

ءوڭىر باسشىسى ۆولونتەرلار قوزعالىسىنىڭ ماڭىزدىلىعى تۋرالى ايتا كەلە، جۇمىس بەرۋشىلەردى جاستاردى قىزمەتكە العان كەزدە ۆولونتەرلىك تاجىريبەلەرىن ەسكەرۋدى سۇرادى.

ۋنيۆەرسيتەت قابىرعاسىندا ستۋدەنتتەردىڭ جوبامەن اينالىسۋى تۋرالى دا اتاپ ءوتىلدى.

«ەلباسى نۇرسۇلتان نازاربايەۆتىڭ تاپسىرماسىمەن كەلەسى جىلى وڭىردە وقىتۋ-زەرتحانالىق كورپۋس سالىنادى. ول زاماناۋي قوندىرعىلارمەن جاراقتاندىرىلماق. الەمدەگى بارلىق ۇزدىك تەحنولوگيالار بىزدە دە بولادى. جاستار وزدەرىنىڭ عىلىمي پوتەنتسيالدارىن بارىنشا قولدانۋلارى قاجەت. ۋنيۆەرسيتەتتە ستۋدەنت ءبىر جوبانى قولعا الىپ، ونى كاسىپكەرلەرمەن بىرگە جۇزەگە اسىراتىنداي تاجىريبەنى ەنگىزۋ كەرەك. ديپلوممەن بىرگە جوباسىن دا قورعاپ شىعادى. ءسويتىپ، ءبىز جاستاردى عىلىم جانە كاسىپكەرلىكپەن اينالىسۋعا ىنتالاندىرامىز»، - دەدى قۇمار اقساقالوۆ.