ەسەپ كوميتەتى: بيۋجەت قارجىسىن ءتيىمسىز جوسپارلاعان 200 دەن استام قىزمەتشى جازالاندى

نۇر-سۇلتان. قازاقپارات - ق ر پارلامەنتى پالاتالارىنىڭ بىرلەسكەن وتىرىسىندا ەسەپ كوميتەتىنىڭ ءتورايىمى ناتاليا گودۋنوۆا قارجىلىق زاڭ بۇزۋشىلىقتارعا جاۋاپتى ادامداردى جازالاۋ ماسەلەسىن كوتەردى، دەپ حابارلايدى قازاقپارات ءتىلشىسى.

«جالپى، ساپاسىز بيۋجەتتىك شەشىمدەر 2018-جىلى 138 ميلليارد تەڭگە ءتيىمسىز شىعىستارعا اكەلىپ سوقتىردى. ال بۇل رەتتە كىم جاۋاپقا تارتىلدى؟ كوبىنە بۇل شەشىمدەردى قابىلدامايتىن قاتارداعى ورىنداۋشىلار جازالانادى. ەسەپ كوميتەتىنىڭ ماتەريالدارىنا سۇيەنسەك، 2018-جىلى تارتىپتىك جاۋاپقا 224 قىزمەتكەر تارتىلىپ، ونىڭ تەك 9 پايىزى باسشىلار»، - دەدى ن. گودۋنوۆا 2018-جىلعى رەسپۋبليكالىق بيۋجەتتىڭ اتقارىلۋى تۋرالى ۇكىمەتتىڭ ەسەبىنە ەسەپ كوميتەتىنىڭ قورىتىندىسىن تانىستىرۋ كەزىندە.

ونىڭ پايىمىنشا، قارجىلىق زاڭ بۇزۋشىلىقتار ءۇشىن لاۋازىمدى ادامداردى مىندەتتى تۇردە جاۋاپقا تارتۋدى ەنگىزۋ بولىگىندە قولدانىستاعى زاڭناماعا وزگەرىستەر ەنگىزۋ وتە ماڭىزدى.

وسى ورايدا زاڭ بۇزۋشىلىق سوماسىنا بايلانىستى، سونداي-اق بيۋجەت قاراجاتى مەن مەملەكەت اكتيۆتەرىن ءتيىمسىز جوسپارلاعانى جانە ءتيىمسىز پايدالانعانى ءۇشىن وسى جاۋاپتىلىقتىڭ ارا-جىگىن بەلگىلەۋ قاجەت.

ءوز كەزەگىندە ۇكىمەت باسشىسى اسقار مامين بيۋدجەتتىك جوسپارلاۋ پروتسەسى بيۋجەت كودەكسى نورمالارىنا سايكەس جۇرگىزىلىپ جاتقانىن ايتا كەلە: «وسى پروتسەستە ءبىرشاما كەمشىلىكتەر بار. قازىر ولاردى جويۋ ماقساتىندا ۇكىمەتتە ءبىرقاتار تۇجىرىمدامالىق وزگەرىستەر دايىنداپ جاتىرمىز»، - دەدى.