سولتۇستىك قازاقستاندىق 200 دارىگەر شەتەلگە وقۋعا جىبەرىلەدى
س ق و اكىمى باسپا ءسوز قىزمەتىنىڭ حابارلاۋىنشا، ءوڭىر باسشىسى قۇمار اقساقالوۆ مەديتسينا قىزمەتكەرلەرىمەن كەزدەسۋ بارىسىندا سالا بويىنشا اتقارىلىپ جاتقان جۇمىستارمەن تانىستىردى. ماسەلەن سوڭعى جىلدارى دەنساۋلىق ساقتاۋعا بولىنگەن قارجى %55 ءوستى، مەديتسينالىق قوندىرعىلاردى ساتىپ الۋعا بەرىلەتىن سوما 2 ەسە ۇلعايدى. جاقىندا جاڭا تەحنيكا، زاماناۋي قوندىرعىلار ساتىپ الىنىپ، 14 ەمدەۋ مەكەمەسى كۇردەلى جوندەلمەك.
«ساپالى ءارى ءتيىمدى جۇمىس ىستەۋ ءۇشىن ەمدەۋ مەكەمەلەرىنىڭ ماتەريالدى-تەحنيكالىق بازاسىن جاقسارتۋىمىز قاجەت. قىركۇيەك ايىندا ماگنيتتى رەزونانستىق توموگرافيا جانە انگيوگراف قوندىرعىلارى الىنادى. ماۋسىمدا كومپيۋتەرلىك توموگراف پەن سيفرلىق مامموگراف كەلەدى. اۋداندارعا 700 ميلليون تەڭگەگە 25 قوندىرعى ساتىپ الىنادى»، - دەدى قۇمار اقساقالوۆ.
سونداي-اق ايماق باسشىسى مەديتسينا قىزمەتكەرلەرىنە جاعىمدى جاڭالىق جەتكىزدى.
«قىركۇيەكتە پەتروپاۆلدا كوپسالالى اۋرۋحانانىڭ قۇرىلىسى باستالادى. ءبىز وسى جوباعا ءبىر جىل جۇمسادىق. بۇل تۇرىك كومپانياسىمەن جۇزەگە اساتىن ەڭ اۋقىمدى جوبا. ەكى جىلدا اۋرۋحانا سالىنادى. ءوڭىر تۇرعىندارىمەن قوسا، كورشىلەس وبلىستار مەن رەسەيدىڭ ازاماتتارى دا ەمدەلە الادى. ۇزدىك قوندىرعىلاردا ۇزدىك دارىگەرلەر جۇمىس ىستەمەك. وسى ماقساتتا شەتەلگە 200 دارىگەردى وقۋعا جىبەرەمىز»، - دەدى ول.
سالتاناتتى جيىن بارىسىندا ءوڭىر باسشىسى ەڭبەگى سىڭگەن دارىگەرلەرگە «دەنساۋلىق ساقتاۋ سالاسىنىڭ ۇزدىگى» توسبەلگىسىن جانە العىس حاتتاردى تابىس ەتتى.
