اۋىلدىڭ 200 مىڭ تۇرعىنى دارىگەر كومەگىن الا الماي وتىر
بۇل تۋرالى بۇگىن سەناتتاعى «ءوڭىر» دەپۋتاتتىق توبىنىڭ وتىرىسىندا ق ر دەنساۋلىق ساقتاۋ ۆيتسە-ءمينيسترى ءلاززات اقتايەۆا ايتتى، دەپ حابارلايدى قازاقپارات ءتىلشىسى.
ونىڭ اتاپ وتۋىنشە، مەديتسينالىق كومەكتىڭ قولجەتىمدىلىگىن ارتتىرۋ ماقساتىندا العاشقى مەديتسيالىق- سانيتارلىق كومەك ۇيىمدارىن ۇلكەيتۋ جۇمىستارى جۇرگىزىلىپ جاتىر. ماسەلەن، سوڭعى 2 جىلدا وڭىرلەردە 214 نىسان پايدالانۋعا بەرىلسە، ونىڭ 67 سى جەكە ينۆەستيتسيا ەسەبىنەن سالىنعان. دەگەنمەن، پاۆلودار، قوستاناي، قىزىلوردا، اتىراۋ، جامبىل، س ق و، ش ق و، ب ق و جانە اقمولا وبلىستارىندا العاشقى مەديتسينالىق-سانيتارلىق كومەك نىساندارىنىڭ عيماراتتارى ەسكىرىپ كەتكەن.
«سونىمەن قاتار ءبىرقاتار وڭىردە مەديتسينالىق تەحنيكامەن جابدىقتاۋ دەڭگەيى تومەن جانە ولار جىلدان جىلعا توزىپ بارادى. بۇعان قوسا، 200 مىڭنان استام ادام تۇراتىن 846 اۋىلدىق ەلدى مەكەندە مەديتسينالىق نىسان جوق. وسىلايشا، ءبىرقاتار ءوڭىر ينفراقۇرىلىمدى جاڭعىرتۋ بويىنشا جەتكىلىكتى شارالار قابىلداماي وتىر. ماسەلەن، نىسانداردىڭ توزۋى 80 پايىزدان اسىپ كەتكەن اقمولا وبلىسىندا سوڭعى 2 جىلدا نەبارى 3 دەنساۋلىق ساقتاۋ نىسانى، نىساندارىنىڭ توزۋ كورسەتكىشى 70 پايىزدان اسىپ جىعىلاتىن جانە 93 ەلدى مەكەنىندە مەديتسينالىق ۇيىمى جوق شىعىس قازاقستان وبلىسىندا 1 عانا نىسان سالىنعان»، - دەدى ۆيتسە- مينيستر.
ل. اقتايەۆانىڭ ايتۋىنشا، ءوڭىر اكىمدىكتەرى الداعى 3 جىلدا 120 ميلليارد تەڭگەدەن استام سوماعا 595 العاشقى مەديتسينالىق- سانيتارلىق كومەك نىسانىن سالۋدى جوسپارلاپ وتىر. مۇنان بولەك، 228 نىسانعا كۇردەلى جوندەۋ جۇمىستارى جۇرگىزىلىپ، ولاردى 11 مىڭنان استام مەديتسينالىق تەحنيكامەن جابدىقتاۋ كوزدەلگەن.
«بۇگىنگى كۇنى مەديتسينالىق تەحنيكامەن جابدىقتاۋعا جانە كۇردەلى جوندەۋ جۇمىستارىن جۇرگىزۋگە قوسىمشا 22 ميلليارد تەڭگەدەن استام قاراجات قاجەت. ءبىراق، جەكەلەگەن وڭىرلەردە اعىمداعى قاجەتتىلىكتى جابۋ ءۇشىن نىسانداردىڭ سانى جەتكىلىكسىز. وسىعان بايلانىستى ءوڭىر اكىمدەرى دەنساۋلىق ساقتاۋ ينفراقۇرىلىمدارىن دامىتۋدىڭ وڭىرلىك پەرسپەكتيۆالى جوسپارى اياسىدا حالىققا العاشقى كومەكتىڭ قادامدىق قولجەتىمدىلىگىن قامتاماسىز ەتۋدى ەسكەرە وتىرىپ، جۇمىستاردى جالعاستىرۋ قاجەت»، - دەدى ول.