اتىراۋدا ون ادام 200 مىڭ، ەكى ادام 3 ميلليون تەڭگەنىڭ اقشالاي جۇلدەسىنە يە بولدى
بۇعان دەيىن اتىراۋدا جۇلدە قورى 40 ميلليون تەڭگەنى قۇرايتىن اقشالاي ۇتىس ويىنى باستالعان بولاتىن. كەيىن ۆاكسينا العان ون ادام 200 مىڭ تەڭگەنىڭ اقشالاي ۇتىسىنا يە بولعانىن حابارلاپ ەدىك.
«ازاماتتىق اليانس» ز ت ب كوروناۆيرۋس ينفەكسياسىنا قارسى ۆاكسينا العاندار اراسىندا ۇيىمداستىرعان اقشالاي ۇتىس ويىنى جەرگىلىكتى تەلەارنانىڭ تىكەلەي ەفيرىندە وتكىزىلدى.
ۇتىس ويىنىن 4 تاۋەلسىز باقىلاۋشى قاداعالادى.
«ءۇشىنشى رەت وتكىزىلگەن ۇتىس ويىنىنا ۆاكسينا العان 35244 ادام قاتىستى. ونىڭ ىشىندە كەزدەيسوق سان ارقىلى تاڭدالعان ون ادام 200 مىڭ تەڭگەنىڭ اقشالاي سەرتيفيكاتىن ۇتىپ الدى. بۇل جولعى ۇتىس ويىنىنىڭ باس جۇلدەسى - 3 ميلليون تەڭگەنىڭ ەكى سەرتيفيكاتى. ونى شىلدە ايىندا ۆاكتسينا العانداردىڭ اراسىنان قۇرمانعازى اۋدانىنىڭ ەكى تۇرعىنى يەلەندى» - دەپ حابارلادى وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتى.
تىكەلەي ەفيردە 3 ميلليون تەڭگەنى ۇتىپ العاننىڭ ءبىرى - ءناسيپوللا عاريفوۆ. ونىڭ وتباسىندا 5 بالا بار. ال، ەكىنشىسى - جەكە كاسىپكەر ايمان جارمۇحامبەتوۆا.