قازاقستاننىڭ شالعايداعى 200 اۋىلى 1 - قىركۇيەككە دەيىن ينتەرنەتكە قوسىلادى

None
None
نۇر- سۇلتان. قازاقپارات -2019 -جىلدىڭ 1 - قىركۇيەگىنە دەيىن قازاقستاننىڭ بەس وبلىسىنداعى شالعاي اۋىلدارعا ينتەرنەت قوسىلادى.

بۇل تۋرالى ق ر تسيفرلىق دامۋ، قورعانىس جانە اەروعارىش ونەركاسىبى مينيسترلىگىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى. مۇنداي مىندەتتەمەنى تالشىقتى- وپتيكالىق بايلانىس جەلىسىن تاراتاتىن وپەراتورلار الىپ وتىر. وعان سايكەس، ءۇش اي ىشىندە 201 اۋىلعا جوعارى جىلدامدىقتاعى ينتەرنەت قوسىلادى. ءبىرىنشى كەزەكتە 223 مەكتەپ، 191 اۋرۋحانا، 117 اكىمدىك ءۇشىن عالامتور قولجەتىمدى بولماق.

 بۇل نىساندار جامبىل، قاراعاندى،  قىزىلوردا، پاۆلودار جانە تۇركىستان وبلىستارىنىڭ اۋىلدارىندا ورنالاسقان. جالپى، 2019 -جىلى «قازاقستان رەسپۋبليكاسىنىڭ اۋىلدىق ەلدى مەكەندەرىن تالشىقتى- وپتيكالىق بايلانىس جەلىلەرى تەحنولوگياسى بويىنشا كەڭ جولاقتى قولجەتىمدىلىكپەن قامتاماسىز ەتۋ» جوباسىن ىسكە اسىرۋ شەڭبەرىندە 685 اۋىلدى ەلدى مەكەندە ورنالاسقان 2 مىڭنان استام مەملەكەتتىك ورگان مەن بيۋدجەتتىك ۇيىمدى ينتەرنەتكە قوسۋ جوسپارلانعان. اتالعان جۇمىس «سيفرلىق قازاقستان» مەملەكەتتىك باعدارلاماسى مەن اۋىلداردى ساپالى ينتەرنەتپەن قامتاماسىز ەتۋ بويىنشا مىندەتتەردى ورىنداۋ شەڭبەرىندە جۇرگىزىلەدى. ەلدى مەكەندەردىڭ ءتىزىمى اۋدان ورتالىقتارى مەن قالالاردان الشاقتىعى، حالىقتىڭ سانى 500 تۇرعىننان كەم بولماۋى، مەملەكەتتىك، ءبىلىم بەرۋ جانە مەديتسينالىق ۇيىمداردىڭ بولۋى سەكىلدى تالاپتارعا ساي جاسالعان بولاتىن.

 «قازىرگى زامانعى تەلەكوممۋنيكاتسيالىق ينفراقۇرىلىمدى قۇرۋ باعىتىنداعى جۇمىس حالىققا زاماناۋي بايلانىس قىزمەتتەرىنە قولجەتىمدىلىگىن قامتاماسىز ەتۋگە مۇمكىندىك بەرەدى. وسىلايشا، قازاقستاندا ينتەرنەتتى پايدالانۋشىلاردىڭ ۇلەسى 2018 -جىلى 81,3 پايىزعا جەتتى. بۇل باعىتتاعى جۇمىس جالعاساتىن بولادى» ، - دەپ اتاپ ءوتتى ق ر سيفرلىق دامۋ، قورعانىس جانە اەروعارىش ونەركاسىبى مينيسترلىگى تەلەكوممۋنيكاتسيا كوميتەتىنىڭ ءتوراعاسى ۆيتالي ياروشەنكو.

سوڭعى جاڭالىقتار