الماتىدا كوروناۆيرۋس ينفەكسياسىن كوبىنە 20-29 ارالىعىنداعى جاستار جۇقتىرعان

None
None
الماتى. قازاقپارات - الماتىدا كوروناۆيرۋس ينفەكسياسىن ەڭ كوپ جۇقتىرعان - 20-29 جاس ارالىعىنداعى جاستار.

بۇل تۋرالى الماتى قالاسى تاۋارلار مەن قىزمەتتەردىڭ ساپاسىن باقىلاۋ دەپارتامەنتىنىڭ باسشىسى ايزات مولداعاسىموۆا بريفينگتە ايتتى، دەپ حابارلايدى قازاقپارات ءتىلشىسى.

رەسمي دەرەكتەرگە سايكەس، الماتىدا تىركەلگەن 91 جاعدايدىڭ 35 سىرتتان كەلگەندەر، 48 ى قاتىناستا بولعاندار، 5 جاعداي جەرگىلىكتى، ۇشەۋى جەرگىلىكتى ناۋقاسپەن قارىم-قاتىناستا بولعاندار.

«1-2-ءساۋىر كۇندەرى كوروناۆيرۋس بويىنشا جاڭادان تىركەلگەن جاعدايدىڭ سانى تومەندەگەنىن بايقاپ وتىرمىز. اۋىرعانداردىڭ كوپشىلىگى مىنا رەيستەرمەن كەلگەندەر: ماسكەۋ- الماتى رەيسى - 33 پايىز، ىستانبۇل- الماتى - 25 پايىز، بەرلين- الماتى - 16 پايىز، سانكت- پەتەربۋرگ رەيسى -13 پايىز، مينسكتەن كەلگەندەردە -13 پايىز»، - دەدى ايزات مولداعاسىموۆا.

سونىمەن قاتار، ول كوروناۆيرۋس انىقتالعان ناۋقاستاردىڭ جاس مولشەرىنە توقتالىپ ءوتتى.

«جاس مولشەرى بويىنشا قارايتىن بولساق، 20-29 جاس ارالىعىنداعىلار كوپ. ودان كەيىن 30-39، 40-49 جانە 50-59 جاستاعىلار شالدىققان. سونداي-اق، 14 جاسقا دەيىنگىلەر اراسىندا - 3 جاعداي، 15-19 ارالىعىندا - 4 جاعداي تىركەلگەن. 60 تان اسقان قاۋىپتى توپتاعىلار بويىنشا - 7 جاعداي تىركەلگەن»، - دەيدى دەپارتامەنت باسشىسى.

سوڭعى جاڭالىقتار