اقمولادا قاتتى جەلدەن 20 ادام جاراقات الىپ، 200 گە جۋىق اۋىلدا جارىق وشكەن

كوكشەتاۋ. قازاقپارات - اقمولا وبلىسىندا ءساۋىردىڭ 7 ىندە بولعان قاتتى جەلدىڭ شىعىنى ەسەپتەلىپ، زارداپتارى قالپىنا كەلتىرىلىپ جاتىر، دەپ حابارلايدى قازاقپارات ءتىلشىسى وبلىستىق ت ج د باسپا ءسوز قىزمەتىنە سىلتەمە جاساپ.

ۆەدومستۆونىڭ مالىمەتىنشە، جىلدامدىعى 30 م/س اسقان قاتتى جەلدىڭ سالدارىنان وڭىردە ەلەكتر جارىعىن تاراتقىش جەلى بۇزىلىپ، الەۋمەتتىك، تۇرعىن ءۇي جانە كوممەرتسيالىق نىسانداردىڭ شاتىرى ۇشقان، سونداي-اق، 20-ادام استام ادام زارداپ شەگىپ، ءبىر ادام كوز جۇمعان.

«قازىرگى كەزدە 189 ەلدى مەكەندە ەلەكترمەن جابدىقتاۋ جەلىسىنە زاقىم كەلدى. ونىڭ ىشىندە «ارەك» ا ق جانە «كوكشەتاۋ ەنەرگو» ج ش س كۇشىمەن 51 ەلدى مەكەندە ەلەكتر ەنەرگياسىن بەرۋ قالپىنا كەلتىرىلسە، 138 اۋىلدا جوندەۋ جۇمىستارى جۇرگىزىلۋدە. ابونەنتەر سانى ەسەپتەلىپ جاتىر. ساعات 15:00 دەيىن 108 ەلدى مەكەنگە جارىق بەرىلەدى. ال قالعان 30 اۋىلدا اپات اۋماعىنا ءوتۋ قيىندىق تۋعىزىپ وتىرعاندىقتان قالپىنا كەلتىرۋ جۇمىستارى كەشەۋلدەپ وتىر. بۇل ەلدى مەكەندەردى بالامالى ەلەكتر تاراتقىش جەلىسى ارقىلى جارىق قوسۋ ماسەلەسى قاراستىرىلۋدا. تولىق جانە ساپالى قالپىنا كەلتىرۋ جۇمىستارى جەل باسىلىپ، كۇن اشىلعان كەزدە عانا جۇزەگە اسىرىلادى»، - دەيدى ۆەدومستۆودان.

ت ج د باسپا ءسوز قىزمەتى كەلتىرگەن دەرەكتەرگە قاراعاندا، تابيعات اپاتىنان كوكشەتاۋ جانە ستەپنوگور قالالارى، سونداي-اق، 12 اۋداندا مەكتەپ، اۋرۋحانا، بالاباقشا ءتارىزدى 43 الەۋمەتتىك نىسان، 70 تۇرعىن ءۇي جانە 6 كوممەرتسيالىق نىساننىڭ شاتىرى ۇشقان. ال بۋراباي اۋدانىنىڭ ۇرىمقاي اۋىلىندا «ماشينا سارايى» ج ش س شاتىرى ۇشىپ، 1980 -جىلعى ەر ادام كوز جۇمدى. «تابيعات اپاتىنان كەلتىرىلگەن شىعىن كولەمى ەسەپتەلىپ، زارداپتارىن جويۋ جۇمىستارى ءۇشىن قاجەتتى ماتەريالدار ازىرلەنۋدە»، - دەپ تولىقتىردى ۆەدومستۆودان.