قازاقستاندا قۇرىلىستاعى باعالار 2,7 پايىزعا قىمباتتادى

استانا. قازاقپارات - قازاقستاندا قۇرىلىستاعى باعالار وسى جىلدىڭ شىلدە ايىندا 2017 -جىلدىڭ جەلتوقسانىمەن سالىستىرعاندا 2,7 پايىزعا قىمباتتادى، دەپ حابارلايدى قازاقپارات ءتىلشىسى ق ر ۇلتتىق ەكونوميكا مينيسترلىگىنىڭ ستاتيستيكا كوميتەتىنە سىلتەمە جاساپ.

ناقتىراق ايتقاندا، قۇرىلىس- مونتاجداۋ جۇمىسىنداعى باعالار جىل باسىنان بەرى 2,8 پايىزعا، كولىكتەر مەن قۇرىلعىلار 2,23 پايىزعا، وسى سالاداعى وزگە دە جۇمىستار 2,8 پايىزعا قىمباتتاعان.

قۇرىلىس ۇيىمدارى ساتىپ العان ماتەريالدار، كەرەك-جاراقتار مەن قۇرىلىمدار باعاسىنىڭ ءوسىمى 0,4 پايىزدى قۇراعان.

وسى جىلدىڭ التى ايىندا كەسىلگەن بولاتتاردىڭ باعاسى 2,9 پايىزعا وسسە، قۇمنىڭ باعاسى 1,9 پايىزعا، گيپسوكارتون مەن ەلەكتر قۇرىلعىلار 1,5 پايىزعا، گيپس 1,1 پايىزعا، بوياۋلار مەن ەمالدار 0,8 پايىزعا، بيتۋم 0,7 پايىزعا قىمباتتاعان.

تاۋارلى بەتوننىڭ باعاسى 0,6 پايىزعا، قيىرشىق تاس پەن اعاش ماتەريالدار 0,3، كەسىلگەن تەرەزەلەر 0,2 پايىزعا ارزانداعان.