جاستارعا جەڭىلدەتىلگەن تارتىپپەن 2,5 پايىز بولاتىن نەسيە قاشان بەرىلەدى

None
استانا. قازاقپارات - ەڭبەك جانە حالىقتى الەۋمەتتىك قورعاۋ ءبىرىنشى ۆيتسە- ءمينيسترى اقمادي سارباسوۆ ەلىمىزدەگى جاستارعا 2,5 پايىزبەن نەسيە بەرۋ كەلەسى ايدا باستالاتىنىن ايتتى، دەپ حابارلايدى قازاقپارات ءتىلشىسى.

«ەڭبەك مينيسترلىگى ەرەجەنى ازىرلەدى. ءتيىستى بۇيرىق شىعىپ، ادىلەت مينيسترلىگىندە تىركەۋدەن ءوتتى. ءبىزدىڭ ۆەدومستۆوعا قاتىستى شەشىم قابىلداندى. قازىرگى كەزدە جەرگىلىكتى اتقارۋشى ورگاندارمەن بىرلەسە وسى تەتىك بويىنشا جۇمىس ىستەپ جاتىرمىز. وسى ايدا جەرگىلىكتى اتقارۋشى ورگاندار مەن قارجى مينيسترلىگى نەسيە كەلىسىمىنە قول قويادى. سوندىقتان كەلەسى ايدان باستاپ بەرۋگە مۇمكىندىك جاسالادى»، - دەدى ا. سارباسوۆ سەناتتا وتكەن باسپا ءسوز ءماسليحاتىندا.

بۇدان بۇرىن حابارلانعانداي، بىلتىر قىركۇيەكتەگى جولداۋىندا ق ر پرەزيدەنتى قاسىم- جومارت توقايەۆ جاستارعا جەڭىلدەتىلگەن تارتىپپەن جىلدىق ءوسىمى 2,5 پايىز بولاتىن شاعىن نەسيە بەرىلەتىنىن ايتتى.

اتاپ ايتقاندا، جاستاردى كاسىپكە تارتۋ ءۇشىن 6 مىڭ ازاماتقا 5 جىل مەرزىمگە 2,5 پايىزبەن شاعىن نەسيە بەرىلەدى. ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆانىڭ ايتۋىنشا، ول نەسيەنىڭ سوماسى 5 ميلليون تەڭگە بولماق.

سوڭعى جاڭالىقتار