پەتروپاۆلدىق ايەل بالاسىنا 2,5 ميلليون تەڭگە اليمەنتىن تولەمەي قاشىپ ءجۇر
س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، پەتروپاۆلدىڭ 47 جاستاعى تۇرعىنى 2020 -جىلدان باستاپ بالاسىن كۇتىپ-باققان مەكەمەگە قاراجات اۋدارماعان. جەكە باسىنىڭ جاعدايىن جاساۋ ءۇشىن استاناعا كەتكەن ايەلدىڭ قارىزى وسى ارالىقتا شامامەن 2,5 ميلليون تەڭگەگە جەتكەن. وزدىگىنەن بەرەشەكتى قايتارۋعا اسىقپاعان بورىشكەردىڭ جۇرگەن جەرىن ءوڭىردىڭ ميگراتسيالىق قىزمەت ماماندارى انىقتادى.
ايەل بورىشكەرلەردى، اليمەنت تولەمەۋشىلەردى جانە تۋىستىق بايلانىسىن جوعالتقان ادامداردى ىزدەستىرۋ بويىنشا ءوتىپ جاتقان اكسيا بارىسىندا تابىلدى. قازىرگى ۋاقىتتا قارىزدى ءوندىرىپ الۋ ءۇشىن پوليتسەيلەر ماتەريالداردى جەكە سوت ورىنداۋشىلارىنا بەرۋگە دايىنداپ جاتىر. اكسيا باستالعان ۋاقىتتا س ق و پ د كوشى-قون قىزمەتى قىزمەتكەرلەرىنىڭ تىزىمىندە 98 ادام بولعان. ولاردىڭ جارتىسى - بالالارىن كۇتىپ- باعۋ بويىنشا مىندەتتەرىن ورىندامايتىن اتا-انالار.
«اكسيا بارىسىندا قىزمەتكەرلەر ىزدەۋدەگى ادامداردىڭ تۋىستارى مەن تانىستارىنىڭ مەكەن- جايلارىن تەكسەرەدى. باسقا دا ىزدەۋ ادىستەرى قولدانىلادى. بۇرىن ولار اكىمشىلىك جاۋاپكەرشىلىككە تارتىلعاندىقتان، تولەم جاساۋدان جالتارعان ادامداردىڭ مەكەن- جايلارىن انىقتاۋ قيىن ەمەس. قابىلدانعان كەشەندى شارالاردىڭ ناتيجەسىندە ەكى كۇندىك ءىس-شارانىڭ قورىتىندىسى بويىنشا ىزدەۋدەگى 16 ادام، ونىڭ ىشىندە 5 بورىشكەر مەن تۋىستىق بايلانىسىن جوعالتقان 1 ادام انىقتالدى». - دەيدى س ق و پ د كوشى-قون قىزمەتى باسقارماسىنىڭ باستىعى تالعات ءابىلوۆ. اكسيا ماۋسىمنىڭ 27-29 ى ارالىعىندا ءوتتى.
بۇعان دەيىن س ق و-دا ءتارتىپ ساقشىلارىنىڭ تۇنگى ۋاقىتتا كوشەدە جۇرگەن جاسوسپىرىمدەردى انىقتاۋ ءۇشىن رەيدكە شىققانىن ايتقان ەدىك. تەك ءبىر تۇندە ەرەسەكتەرسىز كوشەدە قاڭعىرعان 26 جاس ءوسپىرىم انىقتالدى. كامەلەتكە تولماعانداردى تاربيەلەۋ بويىنشا مىندەتتەرىن اتقارماعانى ءۇشىن 8 اتا-انا جاۋاپقا تارتىلدى. سونداي-اق، پەتروپاۆلدا جارىلعىش قۇرىلعى تۋرالى جالعان حابار بەرىپ، تۇرعىندار مەن ارنايى قىزمەتتەردى «اياعىنا تىك تۇرعىزعان» ەر ادام ءبىر جىلعا باس بوستاندىعىنان ايىرىلدى.
اۆتور: اقەركە داۋرەنبەك قىزى