بيىل شاعىن جانە ورتا بيزنەسكە 2,5 تريلليون تەڭگە نەسيە بەرىلەدى

نۇر- سۇلتان. قازاقپارات - ۇكىمەت وتىرىسىندا شاعىن جانە ورتا بيزنەستى قولداۋ شارالارى تالقىلاندى، دەپ حابارلايدى قازاقپارات ءتىلشىسى.

جىل سوڭىنا دەيىن شاعىن جانە ورتا بيزنەس وكىللدەرىنە بەرىلەتىن جەڭىلدەتىلگەن نەسيەنىڭ كولەمى 2,5 تريلليون تەڭگەگە جەتەدى. بۇل تۋرالى ۇلتتىق ەكونوميكا ءمينيسترى اسەت ەرعاليەۆۇكىمەت وتىرىسىندا ايتتى.

«2020 -جىلدىڭ 3-توقسانىندا ەكونوميكاداعى شاعىن جانە ورتا بيزنەستىڭ ۇلەسى 30,5 پايىزعا جەتتى. شاعىن جانە ورتا بيزنەس سۋبەكتىلەرىمەن 2020 -جىلى 32,7 تريلليون تەڭگەگە ءونىم شىعارىلدى»، - دەدى ۆەدومستۆو باسشىسى.

ونىڭ سوزىنە قاراعاندا، قازىرگى تاڭدا اتالمىش سالا 3,4 ميلليون ادامدى جۇمىسپەن قامتىپ وتىر. مينيستر «ىسكەرلىك احۋالدى جاقسارتۋ بويىنشا قابىلدانعان رەفورمالار قازاقستانعا 2019 -جىلى Doing Business رەيتينگىندە 25 - ورىنعا كوتەرىلۋگە مۇمكىندىك بەرگەنىن ەسكە الدى.

«پاندەميا جاعدايىندا جانە كاسىپكەرلەر ءۇشىن جالعاسىپ جاتقان شەكتەۋلەر كەزەڭىندە شاعىن جانە ورتا بيزنەستى قولداۋ ەرەكشە وزەكتى بولىپ وتىر. وسىعان بايلانىستى، اعىمداعى جىلى شاعىن جانە ورتا بيزنەستى جەڭىلدىكپەن نەسيەلەندىرۋ جۇمىستارى جالعاسۋدا. وسى جىلدىڭ ءبىرىنشى توقسانىندا 663 ميلليارد تەڭگە سوماسىنا 16 مىڭنان استام جوبا جەڭىلدەتىلگەن قارجىلاندىرۋ الدى. جىل قورىتىندىسى بويىنشا 2,5 تريلليون تەڭگەگە جەڭىلدەتىلگەن نەسيەمەن 47 مىڭنان استام جوبا قامتاماسىز ەتىلەدى»، - دەدى اسەت ەرعاليەۆ.