بيىل تۇرمىستىق زورلىق-زومبىلىققا قاتىستى 2,5 مىڭ قىلمىستىق ءىس قوزعالدى

نۇر-سۇلتان. قازاقپارات - بيىل تۇرمىستىق زورلىق- زومبىلىق بەلگىلەرى بويىنشا 130 مىڭعا تارتا شاعىم كەلىپ ءتۇستى.

بۇل تۋرالى ق ر ىشكى ىستەر ۆيتسە-ءمينيسترى الەكسەي كالايچيدي ءمالىم ەتتى، دەپ حابارلايدى قازاقپارات ءتىلشىسى.

«ستاتيستيكاعا توقتالساق، بيىلعى 8 ايدا تۇرمىستىق زورلىق- زومبىلىق بەلگىلەرى بويىنشا 130 مىڭعا تارتا ءوتىنىم كەلىپ ءتۇستى. ناتيجەسىندە 2,5 مىڭى بويىنشا قىلمىستىق ءىس قوزعالدى، 30 مىڭعا جۋىعى - اكىمشىلىك ءىس ساناتىندا. ال قالعان جاعدايلاردا جابىرلەنۋشىلەر شاعىمنان باس تارتقاندىقتان ءتيىستى شارالاردى قولدانا المادىق»، - دەدى ۆيتسە-مينيستر ءماجىلىستىڭ جالپى وتىرىسىندا.

ايتا كەتەيىك، بۇگىن ءماجىلىستىڭ جالپى وتىرىسىندا «وتباسىلىق- تۇرمىستىق زورلىق- زومبىلىققا قارسى ءىس- قيمىل تۋرالى» زاڭ جوباسى ءبىرىنشى وقىلىمدا ماقۇلداندى. زاڭ جوباسى وتباسىلىق- تۇرمىستىق زورلىق- زومبىلىققا قارسى ءىس- قيمىل جونىندەگى مەملەكەتتىك ساياساتتىڭ قۇقىقتىق، الەۋمەتتىك، ينستيتۋتسيونالدىق جانە ۇيىمداستىرۋشىلىق نەگىزدەرىن جەتىلدىرۋ ماقساتىندا ازىرلەندى.

اۆتور: رۋسلان عابباسوۆ