اۋىل شارۋاشىلىعى ءونىمىنىڭ ەكسپورتىن كەم دەگەندە 2,5 ەسەگە ارتتىرۋ قاجەت - جولداۋ
بۇل جايىندا بۇگىن رەسپۋبليكالىق باسىلىمداردا جاريالانعان ق ر پرەزيدەنتى نۇرسۇلتان نازاربايەۆتىڭ قازاقستان حالقىنا ارنالعان جولداۋىندا ايتىلعان، دەپ حابارلايدى قازاقپارات.
«اگرارلىق ساياسات ەڭبەك ونىمدىلىگىن تۇبەگەيلى ارتتىرۋعا جانە وڭدەلگەن ءونىمنىڭ ەكسپورتىن ۇلعايتۋعا باعىتتالۋى كەرەك. ءبىز ەگىن ەگىپ، ءداندى داقىلداردى ءوسىرۋدى ۇيرەندىك. ونى ماقتان تۇتامىز. الايدا، قازىر ول جەتكىلىكسىز. شيكىزاتتى قايتا وڭدەۋدى قامتاماسىز ەتىپ، الەمدىك نارىقتارعا جوعارى ساپالى دايىن ونىممەن شىعۋىمىز قاجەت. بۇل ماسەلەنى شەشۋگە بارلىق اگرارلىق كەشەننىڭ تۇبەگەيلى بەت بۇرۋى ماڭىزدى. اگرارلىق عىلىمدى دامىتۋ ماسەلەسى باستى نازاردا بولۋعا ءتيىس. ول ەڭ الدىمەن جاڭا تەحنولوگيالاردى ترانسفەرتتەۋمەن جانە ولاردى وتاندىق جاعدايعا بەيىمدەۋمەن اينالىسۋى قاجەت»، - دەپ اتاپ وتەدى ەلباسى جولداۋىندا.
وسى رەتتە مەملەكەت باسشىسى اگرارلىق ۋنيۆەرسيتەتتەردىڭ ءرولىن قايتا قاراۋ كەرەكتىگىن، ولار ديپلوم بەرىپ قانا قويماي، اۋىل شارۋاشىلىعى كەشەنىندە ناقتى جۇمىس ىستەيتىن نەمەسە عىلىممەن اينالىساتىن مامانداردى دايىنداۋعا تيىستىگىن باسا ايتادى.
«بۇل جوعارى وقۋ ورىندارىنان وقۋ باعدارلامالارىن جاڭارتىپ، اگروونەركاسىپ كەشەنىندەگى وزىق ءبىلىم مەن ۇزدىك تاجىريبەنى تاراتاتىن ورتالىقتارعا اينالۋ تالاپ ەتىلەدى. مىسالى، ەگىن ەگۋ مەن استىق جيناۋدىڭ وڭتايلى ۋاقىتىن بولجامداۋدىڭ، «اقىلدى سۋارۋدىڭ»، مينەرالدى تىڭايتقىش سەبۋدىڭ، زيانكەستەرمەن جانە ارامشوپپەن كۇرەسۋدىڭ ينتەللەكتۋالدى جۇيەلەرى ارقىلى ونىمدىلىكتى بىرنەشە ەسە ارتتىرۋعا بولادى. جۇرگىزۋشىسى جوق تەحنيكا ادامي فاكتوردى ازايتىپ، ەگىنشىلىكتىڭ وزىندىك قۇنىن ايتارلىقتاي تومەندەتۋگە مۇمكىندىك بەرەدى. جاڭا تەحنولوگيالار مەن بيزنەس- مودەلدەردى ەنگىزۋ، اگروونەركاسىپ كەشەنىنىڭ عىلىمعا نەگىزدەلۋىن ارتتىرۋ شارۋاشىلىقتاردى كووپەراتسيالاۋ قاجەتتىگىن كۇشەيتەدى»، - دەدى قازاقستان پرەزيدەنتى.
مۇنان بولەك، ەلباسى اۋىل شارۋاشىلىعى سۋبەكتىلەرىنىڭ كووپەراتيۆ تۇرىندە جۇمىس ىستەۋىنە جان-جاقتى قولداۋ كورسەتۋ كەرەكتىگىن ايتتى.
«مەملەكەت بيزنەسپەن بىرلەسىپ، وتاندىق ءونىمدى حالىقارالىق نارىققا شىعارۋدىڭ ستراتەگيالىق جولىن تاۋىپ، ىلگەرىلەتۋگە ءتيىس. اۋىل شارۋاشىلىعىن قارقىندى دامىتۋ ءونىمنىڭ ساپاسى مەن ەكولوگيالىق تازالىعىن ساقتاي وتىرىپ جۇرگىزىلۋى قاجەت. بۇل بۇكىل الەمگە تانىلاتىن «قازاقستاندا جاسالعان» تابيعي ازىق- تۇلىك برەندىن قالىپتاستىرىپ، ىلگەرىلەتۋگە مۇمكىندىك بەرەدى. سونىمەن قاتار جەردى بارىنشا ءتيىمدى يگەرەتىندەردى ىنتالاندىرىپ، ال دۇرىس پايدالانا المايتىندارعا شارا قولدانۋ كەرەك. ءتيىمسىز سۋبسيديالاردى اۋىل شارۋاشىلىعى كەشەنى سۋبەكتىلەرىنە ارنالعان بانك نەسيەلەرىن ارزانداتۋعا قايتا باعىتتاۋ قاجەت. 5 جىل ىشىندە اگروونەركاسىپ كەشەنىندەگى ەڭبەك ونىمدىلىگىن جانە وڭدەلگەن اۋىل شارۋاشىلىعى ءونىمىنىڭ ەكسپورتىن، تيىسىنشە، كەم دەگەندە 2,5 ەسەگە ارتتىرۋدى تاپسىرامىن»، - دەدى نۇرسۇلتان نازاربايەۆ جولداۋىندا.