ون جىلدا ەلىمىزدە بالالار ءۇيىنىڭ سانى 2,4 ەسە قىسقاردى - ايماعامبەتوۆ
بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«بالالار ۇيىنە قاتىستى ايتار بولسام، بۇل وتە ماڭىزدى مىندەت. مەن سوڭعى 10 -جىلعى دەرەكتەردى عانا ايتايىن. سوڭعى 10 جىلدىڭ ىشىندە بالالار ۇيلەرىنىڭ سانى 210 نان 89 عا قىسقاردى. وزدەرىڭىزدە ايتارلىقتاي ىلگەرىلەۋ بار ەكەنىن كورىپ وتىرسىزدار. ەگەر 2010 -جىلى بالالار ۇيلەرىندە 14 مىڭ بالا ءتالىم-تاربيە السا، بۇگىندە ولاردىڭ سانى 4 مىڭنان ءسال عانا اسادى»، - دەدى مينيستر ق ر پرەزيدەنتى جانىنداعى ادام قۇقىقتارى جونىندەگى كوميسسيا وتىرىسىندا.
ونىڭ اتاپ وتۋىنشە، بۇل - بۇكىل مەملەكەتتىك اپپاراتتىڭ ازاماتتىق قوعاممەن بىرگە جۇرگىزگەن جۇمىسىنىڭ ۇلكەن ناتيجەسى.
«رەسپۋبليكالىق مالىمەتتەر بازاسى قۇرىلدى. وتباسىلىق بالالار ءۇيى، وتباسىلىق ۇلگىدە ءتالىم- تاربيە بەرۋ جۇمىس ىستەپ تۇر. بالا اسىراپ الۋدى دا دامىتا تۇستىك. جەكە باستامالار، ماسەلەن «انا ءۇيى» سىندى ينستيتۋتتار بالالاردى بالالار ۇيىنەن الىپ، وتباسىلارىنا ورنالاستىرادى. وسلايشا، بۇگىندە بۇل باعىتتا ۇلكەن وزگەرىستەردى كورىپ وتىرمىز»، - دەدى اسحات ايماعامبەتوۆ.
اۆتور: مارلان جيەمباي