كونستيتۋتسيالىق وزگەرىستەر 2-3 جىلدا ناتيجە بەرەدى - ەركىن ءابىل

نۇر- سۇلتان. قازاقپارات - كونستيتۋتسيالىق وزگەرىستەر نەگىزىندە قابىلداناتىن زاڭدار الداعى 2-3 جىلدا العاشقى ناتيجەسىن بەرەدى.

مۇنداي پىكىردى مەملەكەت تاريحى ينستيتۋتىنىڭ ديرەكتورى، تاريح عىلىمدارىنىڭ دوكتورى ەركىن ءابىل ءبىلدىردى، دەپ حابارلايدى قازاقپارات ءتىلشىسى.

«ءبىز قازىر بولاشاق وزگەرىستەردىڭ نەگىزىن سالىپ جاتىرمىز. سوندىقتان كوپ سوزباي زاڭدارعا وزگەرىس ەنگىزۋ كەرەك. بۇل جۇمىستار جۇرگىزىلگەن كەزدە بەلسەندى تالقىلاۋ بولۋى ماڭىزدى. زاڭ شىعارۋ پروتسەسسىن تەك جاۋاپتى ورگانداردىڭ قولىنا تاپسىرىپ قويماي، حالىقتىڭ تالقىلاۋىنا سالۋ قاجەت. وعان ساراپشىلار، قوعام بەلسەندىلەرى ءتىپتى وپپوزيتسيا مۇشەلەرىنىڭ دە قاتىسقانى ءجون. ويتكەنى ءتيىستى ورگاندار كورمەي قالاتىن قوعامداعى كەيبىر ماسەلەلەردى وپپوزيتسيا نازاردا ۇستايدى. اتالعان جۇمىستار جۇيەلى جۇرگىزىلسە، ساياسي ومىردەگى وزگەرىستەر الداعى 2-3 جىلدا ءوزىنىڭ العاشقى ناتيجەسىن بەرە باستايدى»، - دەدى ەركىن امانجول ۇلى.

تاريحشىنىڭ ايتۋىنشا، ءبىرىنشى كەزەكتە پارتيالىق جۇيەدە وزگەرىستەر بولادى. ال ەكونوميكالىق جانە الەۋمەتتىك سالاداعى ىرگەلى باستامالار ۇزاق مەرزىمگە جوسپارلانعانىن اتاپ ءوتتى.

اۆتور: ءاليحان اسقار