قازاقستاندا پنيەۆمونياعا شالدىققاندار كوروناۆيرۋسپەن اۋىرعانداردان 2-3 ەسە كوپ

None
None
نۇر-سۇلتان. قازاقپارات - وكپە قابىنۋىنا شالدىققاندار كوروناۆيرۋسپەن اۋىرعانداردان 2-3 ەسە كوپ.

بۇل تۋرالى ق ر دەنساۋلىق ساقتاۋ ءمينيسترى الەكسەي سوي ايتتى، دەپ حابارلايدى قازاقپارات ءتىلشىسى.

«جالپى، ەشتەڭە جاسىرىلىپ قالىپ وتىرعان جوق. وكپە قابىنۋىنا شالدىققاندار سانىن دا كورسەتەمىز. تاياۋ ۋاقىتتا مۇنى تۇراقتى نەگىزدە، ناقتى مالىمەتتەردى ۇسىنىپ وتىرۋدى كوزدەپ وتىرمىز. مەنىڭشە، بۇل جەردە مۇنداي دەرەكتەردى جاريا ەتۋگە ەشقانداي كەدەرگى جوق. تەك بارلىعى شىنايى اۋقىمدى ءتۇسىنۋى ءتيىس»، - دەدى مينيستر بۇگىن ورتالىق كوممۋنيكاتسيالار قىزمەتىندەگى بريفينگ بارىسىندا.

ونىڭ دەرەگىنشە، قازىرگى ۋاقىتتا پنيەۆمونياعا شالدىققاندار سانى كوروناۆيرۋس جۇقتىرعانداردان الدەقايدا كوپ.

«كوروناۆيرۋس ينفەكسياسى جاعدايلارىنا قاراعاندا وكپە قابىنۋى 2-3 ەسە كوپ. قازىرگى ۋاقىتتا وسىنداي ءوسىم بايقالىپ وتىر. سوڭعى كەزدە ءولىم-ءجىتىم دە بار. شىنايى كورىنىس بولۋى ءۇشىن، مۇنى دا ايتىپ وتىرامىز. مۇنداي دەرەكتەردى سايتىمىزدا نەمەسە اقپارات كوزدەرىندە جاريالاۋ جوسپاردا. ۋاقىتىنا قاتىستى ايتار بولسام، كەلەسى اپتادا بۇل مالىمەتتەردى قولعا الىپ، شىنايى جاعدايدى بارلىعى كورۋى ءۇشىن جاريا ەتۋگە تىرىسامىز. دارىگەرلەر مۇنداي دەرەكتەردى كورىپ وتىر. ەگەر حالىقتى دا ول قىزىقتىراتىن بولسا، وندا ءبىز ۇسىنۋعا دايىنبىز»، - دەدى الەكسەي سوي.

اۆتور: مارلان جيەمباي

سوڭعى جاڭالىقتار