قازاقستاندا 2,3 ميلليون ادام ەلەكتروندى ساۋدا جاسايدى
بۇل تۋرالى بۇگىن ۇكىمەت وتىرىسىندا ق ر ۇلتتىق ەكونوميكا ءمينيسترى رۋسلان دالەنوۆ ايتتى، دەپ حابارلايدى قازاقپارات ءتىلشىسى.
«2018-جىلدىڭ قورىتىندىسى بويىنشا ونلاين-ساۋدا نارىعىنىڭ كولەمى 1,5 ەسەگە ءوستى جانە 269 ميلليارد تەڭگەنى قۇرادى. ەلەكتروندىق ساۋدانىڭ ۇلەسى 2,9 پايىزعا تەڭ. ەلەكتروندىق ساۋداداعى بەلسەندى ساتىپ الۋشىلاردىڭ سانى 2 ەسەگە ارتىپ، 2,3 ميلليون ادامدى قۇرادى»، - دەدى مينيستر.
ونىڭ دەرەگىنشە، قازاقستاندىق ەلەكتروندى ساۋدا نارىعىندا 1700 دەن استام دەربەس ينتەرنەت-دۇكەن جۇمىس ىستەيدى. ونىڭ ۇشتەن ءبىرى - 509 ى، سالىق جەڭىلدىكتەرىن الۋدى قالاۋشىلار بولىپ سانالادى. ەلىمىزدە 1 ميلليوننان استام شوب سۋبەكتىلەرىنە ءوز تاۋارلارىن ساتۋعا مۇمكىندىك بەرەتىن 20 عا جۋىق ەلەكتروندىق ساۋدا الاڭدارى قىزمەت ەتەدى.
«قازاقستانداعى ەلەكتروندىق كوممەرتسيا نارىعى قۇرىلىمىنىڭ 68 پايىزىن تاۋارلار ساۋداسى قۇراسا، 32 پايىزىن كورسەتىلەتىن قىزمەتتەر قۇرايدى. تاۋارلاردىڭ ىشىندە - قۇرىلىس ماتەريالدارى، تۇرمىستىق تەحنيكا، كوسمەتيكا، كيىم جانە اياق كيىم ۇلكەن سۇرانىسقا يە. كورسەتىلەتىن قىزمەتتەردىڭ ىشىندە - اۋە جانە تەمىرجول بيلەتتەرىن ساتۋ، مادەني ءىس-شارالار مەن كوممۋنالدىق قىزمەتتەر ءۇشىن اقى تولەۋ»، - دەدى ول.