كوپبالالى وتباسىلارعا 2-3 پايىزبەن يپوتەكا بەرۋ مامىردا باستالادى

نۇر- سۇلتان. قازاقپارات - كوپبالالى وتباسىلارعا باسپانانى 2-3 پايىزدىق نەسيەمەن بەرۋ شارالارى مامىردا باستالادى. بۇل تۋرالى پارلامەنت ءماجىلىسىنىڭ جالپى وتىرىسىندا بەلگىلى بولدى، دەپ حابارلايدى قازاقپارات ءتىلشىسى.

«ەلباسى كوپبالالى وتباسىلاردى قولداۋ شارالارىن كۇشەيتۋ ءۇشىن تۇرعىن ءۇي قۇرىلىس جيناقتارى جۇيەسى ارقىلى جىلدىق 2-3 پايىزبەن تۇرعىن ءۇي قارىزىن بەرۋدىڭ جەڭىلدەتىلگەن تەتىگىن ازىرلەۋدى دە تاپسىردى. وسىعان بايلانىستى جىلدىق ەكى پايىزبەن باسپانا قارىزىن الۋ ءۇشىن قانداي شارتتار كوزدەلگەن؟ سونىمەن كوپبالالى وتاسىلار ءۇشىن جەڭىلدىكتى تۇرعىن ءۇي قارىزىن بەرۋ قاشان باستالادى؟» ، - دەپ سۇرادى دەپۋتات باقىتبەك سماعۇل.

ءوز كەزەگىندە «قازاقستاننىڭ تۇرعىن ءۇي قۇرىلىس جيناق بانكى» ا ق باسقارما ءتوراعاسىنىڭ ورىنباسارى جانار جۇبانيازوۆا قازىرگى ۋاقىتتى بۇل ماسەلەنىڭ قارجىلىق نەگىزدەمەسى جاسالعانىن اتاپ ءوتتى.

«قازىرگى تاڭدا ول ەكونوميكالىق ساراپتامادان ءوتىپ جاتىر. سودان كەيىن قايتادان مەملەكەتتىك- جەكەشەلىك ارىپتەستىك ورتالىعىنا ەنگىزەمىز. ۇلتتىق ەكونوميكا مينيسترلىگى ماقۇلداعاننان كەيىن، بارلىق ءتيىستى قۇجاتتاردى راسىمدەيمىز»، - دەدى ول.

ج. جۇبانيازوۆانىڭ ايتۋىنشا، اكىمدىكتەر تىزىمدە تۇرعاندار اياسىندا كوپبالالى انالاردىڭ جانە دە مۇگەدەك بالالارى بار وتباسىلاردىڭ ەكى پايىزدىق نەسيەگە باسپانا الۋ مۇمكىندىگى بويىنشا تۇرعىن ءۇي قۇرىلىس جيناق بانكىنە جولداما بەرەدى.

«سول جولداما بويىنشا وسى وتباسىلار ءبىزدىڭ بانكتەن نەسيە الۋ مۇمكىندىگىنە يە بولادى. ءبىزدىڭ ويىمىزشا، مامىر ايىنىڭ اياعىنا تامان نەسيە بەرۋدى باستايمىز»، - دەدى ول.

ايتا كەتەيىك، ق ر تۇڭعىش پرەزيدەنتى - ەلباسى نۇرسۇلتان نازاربايەۆ الەۋمەتتىك جاعىنان از قامتىلعان ازاماتتارعا 2 پروتسەنتتىك يپوتەكا بەرۋ ماسەلەسىن قارىستىرۋدى تاپسىرعان بولاتىن. اتالعان نەسيە ناقتى ءۇش كاتەگورياعا بەرىلۋى كەرەك. ولار - كوپبالالى وتباسىلار، تولىق ەمەس وتباسىلار جانە مۇگەدەك بالالارى بار وتباسىلار.

اۆتور: رۋسلان عابباسوۆ