سارى ارقا گاز قۇبىرى 2,3 ميلليون ادامدى تابيعي گازبەن قامتاماسىز ەتەدى
اتالمىش ستانسادان باستاپ قىزىلوردا، جەزقازعان، قاراعاندى، تەمىرتاۋ، استانا باعىتى بويىنشا گاز قۇبىرى قۇرىلىسى جۇرگىزىلەدى، دەپ حابارلايدى قازاقپارات ءتىلشىسى وڭىرلىك كوممۋنيكاتسيالار قىزمەتىنە سىلتەمە جاساپ.
«قاراوزەك» جاڭا ستانساسى «بەينەۋ- بوزوي- شىمكەنت» ماگيسترالدىق گاز قۇبىرىنان 944 شاقىرىمدا ورنالاسقان. وسى جىلعى ساۋىردە اقتوبە وبلىسىندا پايدالانۋعا بەرىلگەن «بوزوي» ستانساسىمەن قوسارلى جۇمىسقا ەسەپتەلگەن. بۇل «بەينەۋ- بوزوي- شىمكەنت» ماگيسترالدىق گاز قۇبىرىنىڭ وتكىزگىشتىك قابىلەتتىلىگىن 10 ميلليارد تەكشەمەتر گازعا دەيىن ۇلعايتۋعا مۇمكىندىك بەرەدى.
بۇدان باسقا، «قاراوزەك» ك س قۇرىلىسى قازاقستاننىڭ استاناسى استانانى جانە سولتۇستىك وڭىرلەردى الداعى گازداندىرۋدى ەسەپكە الا وتىرىپ جوسپارلانعان. بۇل ماقساتتى ورىنداۋعا ستانسا قۋاتى تولىعىمەن جەتەدى.
بيىل «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋىنىڭ بەسىنشى باستاماسى «ەلدى گازبەن قامتاماسىز ەتۋدى جالعاستىرۋ» بولاتىن. وسى ورايدا، قازىرگى تاڭدا، «سارى ارقا» ماگيسترالدى گاز قۇبىرى قۇرىلىسىنىڭ العاشقى كەزەگىندەگى قىزىلوردا- جەزقازعان- قاراعاندى- تەمىرتاۋ- استانا باعىتىن 2018 -جىلدىڭ قاراشا- جەلتوقسان ايلارىندا باستاپ، 2019 -جىلدىڭ جەلتوقسان ايىندا تولىقتاي اياقتاۋ جوسپارلانۋدا.
«تولىعىراق ايتا كەتسەك، «سارى ارقا» م گ ق جوباسى مەملەكەتتىك ساراپتامادان وتكىزىلىپ، تامىز ايىنىڭ اياعىندا قورىتىندىسى الىندى. العاشقى كەزەڭنىڭ قۇرىلىسى 267 ميلليارد تەڭگەنى قۇراپ وتىر. جالپى ۇزىندىعى 1000 شاقىرىمعا سوزىلعان گاز قۇبىرى قىزىلوردا، قاراعاندى جانە اقمولا وبلىستارىنىڭ اۋماعىنان وتكىزىلەدى. ونىڭ 178 شاقىرىمى سىر وڭىرىندە. جوبانى ىسكە اسىرۋ بارىسىندا 800-گە جۋىق ادام ۋاقىتشا، قۇرىلىس اياقتالعان سوڭ 220 ازامات تۇراقتى جۇمىسپەن قامتىلادى دەپ جوسپارلانۋدا.
ايماقتا گاز قىسىمى دەڭگەيىن رەتتەۋ ماقساتىندا تاعى ەكى بىردەي كومپرەسسورلىق ستانسا سالىنۋدا. قازالى اۋدانى اقسۋات ەلدى مەكەنى مەن ارالعا قاراستى سەكسەۋىل اۋىلىندا تۇرعىزىلىپ جاتقان بۇل نىسانداردىڭ قۇرىلىسى بيىل اياقتالۋى ءتيىس»، - دەدى وبلىستىق ەنەرگەتيكا جانە تۇرعىن ءۇي شارۋاشىلىعى باسقارماسى باسشىسىنىڭ ورىنباسارى ەرلان جولامانوۆ.
جوبانى جۇزەگە اسىرۋ ارقىلى «سارى ارقا» ماگيسترالدى گاز قۇبىرىنىڭ بويىنداعى 171 ەلدى مەكەن تابيعي گازبەن قامتاماسىز ەتىلەدى. سونىمەن قاتار، شاعىن جانە ورتا بيزنەستىڭ جاڭا وندىرىستەرىن اشۋعا مۇمكىندىك بەرەدى دەپ جوسپارلانۋدا.
ەڭ باستىسى، جوبانىڭ قۇرىلىس- مونتاج جۇمىستارىنىڭ بارىسىندا شامامەن ۋاقىتشا 800 ادام جۇمىسپەن قامتىلسا، ماگيسترالدىق گاز قۇبىرى ىسكە قوسىلعاننان كەيىن 200-دەن استام ادامدى تۇراقتى جۇمىسپەن قامتىلادى.