قازاقستاندىق كارديولوگتار جۇرەك يشەمياسىن 2-3 مينۋتتا 100 پايىز دالدىكپەن انىقتايدى
جاڭا تەحنولوگيا الماتىداعى كارديولوگيا جانە ىشكى اۋرۋلار عىلىمي- زەرتتەۋ ينستيتۋتىندا تاجىريبەگە ەنگىزىلگەن.
ۇشىندا داتچيگى بار ۋلتراجىڭىشكە قۇرىلعى جۇرەك قان تامىرىنا ەنگىزىلەدى. ول تامىرلاردىڭ تارىلعان تۇستارىنداعى قان كولەمىن ولشەيدى. ەگەر جەتكىلىكتى بولسا، وندا ناۋقاس ءدارى- دارمەكپەن ەمدەلەدى. ال ەگەر جەتكىلىكسىز بولسا، تامىرلاردى كەڭەيتەتىن ستەنت قويىلادى. «باسقا ادىستەرگە قاراعاندا جاڭا تەحنولوگيا قاۋىپسىز ءارى وپەراتسيادان كەيىنگى اۋىرلىقتى ازايتادى»، - دەيدى دارىگەرلەر.
الەكسەي كولەسنيكوۆ، كارديولوگيا جانە ىشكى اۋرۋلار ع ز ي ءبولىم باسشىسى:
- بۇرىن ءبىز ناۋقاسپەن سويلەسىپ، جۇگىرۋ جولىمەن جۇگىرتىپ، جۇرەكتىڭ قاعىسىن كارديوگرامما ارقىلى انىقتايتىنبىز. الايدا، ەسكى ءادىستىڭ دالدىگى از بولاتىن. ەندى جاڭا تەحنولوگيامەن دەرتتى ناقتى انىقتاۋعا بولادى. بۇل وتە ماڭىزدى. سەبەبى، قان تامىرى 80 پايىزعا تارىلعان بولسا دا، كەيدە ءدارى- دارمەكپەن- اق ەمدەۋگە بولادى.
www.24.kz