جىل ىشىندە قازاقستان مەن كورەيانىڭ تاۋار اينالىمى 2,2 ميلليارد دوللارعا ارتقان - كيم دە سيك

الماتى. قازاقپارات - كورەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى كيم دە-سيك، ب ا ق وكىلدەرىمەن كەزدەسىپ، ەكى ەل اراسىنداعى ەكونوميكا سالاسىنىڭ دامۋىن ايتىپ بەردى، دەپ حابارلايدى قازاقپارات ءتىلشىسى.

وتكەن جىلى قازاقستان مەن وڭتۇستىك كورەيا اراسىنداعى تاۋار اينالىمى 2,2 ميلليارد دوللاردى قۇرادى.

«كورەيا رەسپۋبليكاسى قازاقستاندا ءوز ءىسىن اشقان شەتەلدىك ينۆەستورلاردىڭ العاشقى وندىعىنا كىرەدى. ينۆەستيتسيالار نەگىزىنەن ەكونوميكانى دامىتاتىن ماشينا جاساۋ، ەلەكترونيكا مەن فارماتسيەۆتيكا سىندى سالالارعا باعىتتالعان. جالپى ينۆەستيسيا كولەمى 4 ميلليارد دوللاردان استى. بۇگىنگى تاڭدا كورەي تاراپى قازاقستان بيلىگىنىڭ بيزنەستى دامىتۋعا جاساعان جەڭىلدىكتەرىنە قىزىعۋشىلىق تانىتىپ وتىر»، - دەيدى كورەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى كيم دە-سيك.

بۇگىنگى كۇنى قازاقستاندا وڭتۇستىك كورەيانىڭ كاپيتالى بار 500-گە جۋىق كومپانيا جۇمىس ىستەيدى. سوڭعى جىلدارى «Hyundaى»، «LG، Samsung» ، «Lotte Confectionery»، «Dongil Highvill» سياقتى كومپانيالار قازاقستاندا اسا اۋقىمدى تابىستارعا قول جەتكىزۋدە.

«ءبىز ەكى ەل اراسىنداعى جوبالاردى ەرەكشە نازاردا ۇستايمىز. مىسالى، كورەيالىق كومپانيانىڭ قاتىسۋىمەن ۇلكەن الماتى اينالما جولىنىڭ قۇرىلىسى ءجۇرىپ جاتىر. 2019 -جىلدىڭ سوڭىنا دەيىن كورەيالىق اۆتوموبيلدەردى جيناۋ بويىنشا جاڭا زاۋىتتىڭ قۇرىلىسى اياقتالادى. ماشينا زاۋىتى جىلىنا 20 مىڭ كولىك قۇراستىرىپ شىعارادى. كارىس بيزنەسى قازاقستاننىڭ تاماق ونەركاسىبى، تاۋ-كەن بايىتۋ ونەركاسىبى سالارىندا تابىستى جۇمىس ىستەۋدە»، - دەپ اتاپ ءوتتى كيم دە- سيك.

سونىمەن قاتار ول بۇگىندە قازاقستاندا سيفرلاندىرۋعا باسا نازار اۋدارىلىپ جاتقاندىعىن ايتا كەلە، كورەيانىڭ كوپ جىلدىق تاجىريبەسى بۇل سالانىڭ قازاقستاندا دامۋىنا زور ۇلەسىن قوساتىندىعىن اتاپ ءوتتى.

«IT سالاسىندا كورەيا ءوزىنىڭ سمارت تەحنولوگيالارىن قازاقستانعا تولىقتاي ەنگىزۋگە دايىن. قازاقستان پرەزيدەنتى مەن كورەيا پرەزيدەنتىنىڭ كەزدەسۋىنەن كەيىن بۇدان وزگە جاڭا باعىتتاعى سالالار قولعا الىنباق»، - دەپ قوستى ەلشى.