قازاقستان ءوز الاڭىندا بەلارۋستى 2:1 ەسەبىمەن جەڭدى
22 قىركۇيەك 22:19

قازاقستان ءوز الاڭىندا بەلارۋستى 2:1 ەسەبىمەن جەڭدى

استانا. قازاقپارات - فۋتبولدان قازاقستان قۇراماسى UEFA ۇلتتار ليگاسىنىڭ B ليگاسىنا جولداما الدى، دەپ حابارلايدى قازاقپارات ءتىلشىسى.

بۇگىن قازاقستان ءوز الاڭىندا بەلارۋس قۇراماسىن قابىلدادى. قازاقستاندىق فۋتبولشىلار ءۇشىن ولار - قولايسىز قارسىلاس. ەكى قۇراما بۇعان دەيىن ءبىر-بىرىمەن التى ويىن وتكىزگەن.

ونىڭ ەكەۋى تەڭ ناتيجەمەن اياقتالسا، قالعانىندا بەلارۋستەر جەڭىسكە جەتكەن ەدى.

وعان قوسا تۋرنير كەستەسىندە قازاقستاندىق فۋتبولشىلار كوش باستاپ تۇرسا، بەلارۋس قۇراماسى نەبارى ەكى ۇپايمەن ءتورتىنشى ورىندا كەلە جاتقان بولاتىن.

ايتا كەتسەك، بۇگىن قازاقستاندىق فۋتبولشىلار جەڭىسكە جەتسە، قۇراماسى الداعى ماۋسىمداعى ۇلتتار ليگاسىندا B ديۆيزيونىندا ەۋروپانىڭ الدىڭعى قاتارلى قۇرامالارىمەن سىنعا تۇسۋگە مۇمكىندىك الادى.

وعان قوسا 2024-جىلعى ەۋروپا چەمپيوناتىنىڭ ىرىكتەۋ ويىندارىنا قاتىسۋىنا جول اشىلاتىن.

وسىنداي سەبەپتەرگە بايلانىستى كەزدەسۋ تارتىستى باستالدى. ەكى قۇراما العا قاراي ۇمتىلدى.

دەگەنمەن ويىننىڭ ءبىراز بولىگىنە دەيىن تابلوداعى ەسەپ وزگەرگەن جوق. كەزدەسۋدىڭ 29-مينۋتىندا قازاقستاندىق ميحايل گابىشيەۆ ەسەپ اشتى.

بۇدان كەيىن دە قازاقستاندىق فۋتبولشىلاردىڭ ەسەپ اشاتىن بىرنەشە مۇمكىندىگى بولدى. دەگەنمەن ونى پايدالانا العان جوق.

ال 45-مينۋتتا بەلارۋس فۋتبولشىسى پاۆەل ساۆيتسكي تارازى باسىن تەڭەستىردى.

ەكىنشى كەزەڭنىڭ 79-مينۋتىندا قازاقستاندىق باكتيەر زاينۋتدينوۆ گول سوقتى.

وسىلايشا قازاقستان قارسىلاسىن 2:1 ەسەبىمەن جەڭدى.

ناتيجەسىندە الداعى ماۋسىمدا B ليگاسىندا ويناۋعا مۇمكىندىك الدى. قازاقستاندىق فۋتبولشىلار بەلارۋسكە قارسى جەتى ويىنعا سوزىلعان ساتسىزدىكتەر سەرياسىن وسىلايشا بۇزدى.

ەندى قازاقستان قۇراماسى 25 - قىركۇيەكتە سىرت الاڭدا ازەربايجانمەن كەزدەسەدى.

ايتا كەتسەك، قازاقستاندىق فۋتبولشىلار C ليگاسى ءۇشىنشى توبىندا سىنعا تۇسەدى. قارسىلاستارى - بەلارۋس، ازەربايجان مەن سلوۆاكيا.

جاڭالىقتار