بوكستان الەم چەمپيوناتى: 2 قازاقستاندىق 1/8 فينالعا شىقتى

نۇر- سۇلتان. قازاقپارات - پولشانىڭ كەلتسە قالاسىندا ءوتىپ جاتقان جاستار اراسىنداعى الەم چەمپيوناتىندا قازاقستاندىق ەكى بوكسشى 1/8 فينالىنا شىقتى، دەپ حابارلايدى قازاقپارات قازاقستان بوكس فەدەراتسياسىنا سىلتەمە جاساپ.

بۇگىن شارشى الاڭعا ەلىمىزدىڭ اتىنان ەكى بوكسشى شىقتى. اتاپ ايتقاندا، كەنجە مۇرات ۇلى (52 كەلى) شوتلاندتىق لەننون ماللليگاندى جەڭدى. ءمادي ءامىروۆ (91 كەلى) يتالياندىق لۋكا تيستارەلليدەن مىقتى ەكەنىن دالەلدەدى. سونداي- اق، كەشە قازاقستاندىق ەربولات سابىر العاشقى كەزدەسۋىندە جەڭىسكە جەتتى. ول ۆەنگريالىق قارسىلاسىن قاپى قالدىردى.

ايتا كەتەيىك، الەم چەمپيوناتىندا ەلىمىزدىڭ اتىنان سانجار تاشكەنباي (49 كەلى)، كەنجە مۇرات ۇلى (52 كەلى)، ەربولات سابىر (56 كەلى)، ەلنۇر ءسۇيىنباي (60 كەلى)، سابىرجان اقحالىقوۆ (64 كەلى)، نۇرجان امانكەلدى (69 كەلى)، دياس مولجىگىتوۆ (75 كەلى)، ەراسىل جاكپەكوۆ (81 كەلى)، ءمادي ءامىروۆ (91 كەلى) جانە امانات سابىرعالي (91 كەلىدەن جوعارى) سىنعا تۇسەدى.