قازاقى ءيت تۇقىمدارىنىڭ ۇلتتىق ورتالىعى 1- شىلدەدە ىسكە قوسىلادى
بۇل تۋرالى ەكولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتى ءتوراعاسىنىڭ ورىنباسارى اندرەي كيم ءمالىم ەتتى، دەپ حابارلايدى قازاقپارات ءتىلشىسى.
ەسكە سالا كەتسەك، بيىل 3- قاڭتاردا مەملەكەت باسشىسى قازاقى ءيت تۇقىمدارىن ساقتاۋ تۋرالى زاڭعا قول قويعان ەدى.
«اتالعان زاڭدا ورمان شارۋاشىلىعى جانە جانۋارلار دۇنيەسى كوميتەتىنە قاراستى «وحوتزووپروم» رەسپۋبليكالىق مەملەكەتتىك قازىنالىق كاسىپورنىنىڭ قۇرىلىمدىق بولىمشەسى «قازاقى ءيت تۇقىمدارى ۇلتتىق ورتالىعىن» قۇرۋ كوزدەلگەن. ونىڭ اشىلۋى بيىل شىلدەگە جوسپارلانىپ وتىر. ۇلتتىق ورتالىق قازاقى ءيت تۇقىمدارىن ساقتاۋ جانە كوبەيتۋمەن اينالىسادى. سول سياقتى قازاقى يتتەرمەن اينالىساتىن ماماندار دايارلانادى. سونىمەن قاتار اسىل تۇقىمدى يتتەردى ءوسىرۋ جانە ولارعا كۋالىك بەرۋ بويىنشا كينولوگيالىق قىزمەت بولادى. قازاقى ءيت تۇقىمدارىن ساقتاۋمەن اينالىساتىن زاڭدى جانە جەكە تۇلعالارمەن بىرلەسىپ تۇقىم ستاندارتتارى پىسىقتالىپ، سىناقتار، كورمەلەر مەن بايقاۋلار ۇيىمداستىرىلادى»، - دەدى اندرەي كيم ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءمالسحياتىندا.
سونداي-اق، ا. كيم وتكەن جىلى رەسپۋبليكالىق بيۋجەتتەن 2023، 2024 جانە 2025-جىلدارعا ارنالىپ 1,4 ميلليارد تەڭگە قاراستىرىلعانىن ايتتى.
«بيىل قاراجات 1- شىلدەدەن كەيىن بولىنەدى. قارجىلاندىرۋ ەكى باعىت بويىنشا جۇرەدى. ءبىرىنشىسى - قازاقى ءيت تۇقىمدارىن ساقتاۋ جانە ولاردىڭ سانىن ارتتىرۋ باعىتىندا. ەكىنشىسى، يتتەرگە دالالىق سىناقتار، كورمەلەر مەن بايقاۋلاردى ۇيىمداستىرۋعا مەملەكەتتىك الەۋمەتتىك تاپسىرىس بويىنشا»، - دەيدى ول.
ونىڭ ايتۋىنشا، بيىل مەملەكەتتىك الەۋمەتتىك تاپسىرىسقا 198 ميلليون تەڭگە جۇمساۋ جوسپارلانعان.