بۇگىن - جەتىسۋ وبلىسىنىڭ قۇرىلعانىنا 1 جىل
ايماقتىڭ ءبىر جىلدىعىندا تالدىقورعاندىق 72 وتباسى باسپانالى بولدى. جاڭا شاڭىراقتىڭ كىلتى نەگىزىنەن مۇمكىندىگى شەكتەۋلى جاندارعا، تولىق ەمەس وتباسى وكىلدەرى مەن اتا-انا قامقورلىعىنان ايىرىلعان جاستارعا بەرىلدى. ءوڭىر باسشىسى بەيبىت يسابايەۆ جىل اياعىنا دەيىن اي سايىن كوپقاباتتى تۇرعىن ۇيلەر قولدانىسقا بەرىلىپ، باسپانا كەزەگىندە تۇرعانداردىڭ ماسەلەسىن شەشۋ جوسپارى تۇرعانىن اتاپ ءوتتى. قازىر وبلىس ورتالىعىندا 15 مىڭعا جۋىق ادام ءۇي كەزەگىندە تۇر. بيىل 2 مىڭ ادام قونىس تويىن تويلايتىن بولادى.
سونداي-اق مەرەكەلىك ءىس-شارا بارىسىندا بىلتىر 8- ماۋسىمدا دۇنيەگە كەلگەن 22 نارەستەنىڭ تۇساۋى كەسىلدى. جەتىسۋ وبلىسى قۇرىلعان كۇنى ايماقتا 47 بوبەك دۇنيەگە كەلگەن.
«ءبىز بالالارىمىزدىڭ وسىنداي ايتۋلى كۇنى دۇنيەگە كەلگەنىنە وتە قۋانىشتىمىز. ەندى جىل سايىن بالاپاندارىمىزدىڭ تۋعان كۇنىن جەتىسۋ وبلىسىنىڭ قۇرىلۋىمەن قاتار اتاپ وتەپ وتىراتىن بولامىز. وبلىسىمىز قالاي دامىسا، بالالارىمىز دا ءوسىپ-ءونىپ، ۇلكەن ازامات بولىپ، ەلگە قىزمەت ەتەدى دەگەن سەنىمدەمىز»، - دەيدى ەگىز قىزدىڭ اناسى ناعيما قوجانبايەۆا.