الماتىدا 1-شىلدەدەن باستاپ حالىققا قىزمەت كورسەتۋ ورتالىعىندا نەكە قيدىرۋعا بولادى
بۇل تۋرالى وڭىرلىك كوممۋنيكاتسيالار قىزمەتىنىڭ الاڭىندا وتكەن باسپا ءسوز ءماسليحاتىندا الماتى قالاسى ادىلەت دەپارتامەنتىنىڭ وكىلدەرى ايتتى، دەپ حابارلايدى قازاقپارات ءتىلشىسى.
الماتى قالالىق ادىلەت دەپارتامەنتىنىڭ تىركەۋ قىزمەتى سالاسىنداعى باقىلاۋ ءبولىمى باسشىسىنىڭ مىندەتىن اتقارۋشى جانار بەيسەنوۆانىڭ سوزىنشە، ح ق ك و-دا ازاماتتىق حال اكتىلەرىن تىركەۋگە بايلانىستى مەملەكەتتىك قىزمەتتەردىڭ بارلىق تۇرلەرى كورسەتىلەتىن بولادى.
«وسىلايشا، ازاماتتاردىڭ بارلىق مەملەكەتتىك قىزمەتتەردى ءبىر جەردەن «ءبىر تەرەزە» قاعيداتى بويىنشا الۋ ماقساتىندا بارلىق حالىققا قىزمەت كورسەتۋ ورتالىقتارى ءبىرىڭعاي جۇيەگە بىرىكتىرىلگەن»، - دەدى دەپارتامەنت وكىلى.
سونداي-اق، ول كورسەتىلەتىن مەملەكەتتىك قىزمەتتەرگە توقتالدى.
«كورسەتىلەتىن مەملەكەتتىك قىزمەتتەرگە ءبىرقاتار فۋنكسيا جاتادى. اتاپ ايتار بولساق، نەكە قيۋ جانە بۇزۋدى، ءولىمدى مەملەكەتتىك تىركەۋ، اكت جازبالارىنا وزگەرىستەر، تولىقتىرۋلار، تۇزەتۋلەر ەنگىزۋ، ونىڭ ىشىندە اتىن، اكەسىنىڭ اتىن، تەگىن وزگەرتۋ، اكەلىكتى (اناسى ەكەنىن) انىقتاۋ، بالا اسىراپ الۋ بار. سونىمەن قاتار ازاماتتىق حال اكتىلەرىنىڭ جازبالارىن قالپىنا كەلتىرۋ جانە جويۋ، باستاپقى جانە قايتالاما كۋالىكتەردى، انىقتامالاردى ەلەكتروندىق نۇسقادا نەمەسە قاعاز تۇرىندە بەرۋ»، - دەپ ءتۇسىندىردى جانار بەيسەنوۆا.
ادىلەت دەپارتامەنتىنىڭ تىركەۋ قىزمەتى سالاسىنداعى باقىلاۋ ءبولىمىنىڭ جەتەكشى مامانى سارا مۇرزيەۆا جەكە ءومىر، جەكە جانە وتباسىلىق قۇپيا زاڭمەن قورعالاتىنىن اتاپ ءوتتى.
سونداي-اق ازاماتتاردىڭ جەكە جانە وتباسىلىق ءومىرى تۋرالى مالىمەتتەردى جاريا ەتكەنى ءۇشىن جاۋاپكەرشىلىك بار ەكەنىن ەسكە سالدى.
«تىركەۋشى ورگانداردىڭ قىزمەتكەرلەرى اسىراپ الۋشىنىڭ كەلىسىمىنسىز اسىراپ الۋ تۋرالى قانداي دا ءبىر مالىمەتتەردى حابارلاۋعا جانە اسىراپ الۋشىلاردىڭ اسىراپ الىنعان بالانىڭ اتا-اناسى بولىپ تابىلمايتىندىعى تۋرالى اقپاراتتى قامتيتىن قۇجاتتاردى بەرۋگە قۇقى جوق. بۇل ماسەلە قاتاڭ باقىلاۋدا»، - دەپ قورىتىندىلادى سارا مۇرزيەۆا.
اۆتور:
الما مۇقانوۆا