بيىلعى جىلعى 1-قىركۇيەككە دەيىن ەلىمىزگە جەتكىزىلگەن كولىكتى زاڭداستىراتىن قۇجات قابىلداندى - سەنات

استانا. قازاقپارات - سەناتتىڭ جالپى وتىرىسىندا «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» كودەكسىنە جانە «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» كودەكسىن قولدانىسقا ەنگىزۋ تۋرالى» ق ر زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكى وقىلىمدا قارالىپ، قابىلداندى، دەپ حابارلايدى قازاقپارات ءتىلشىسى.

«زاڭ جوباسى مەملەكەت باسشىسىنىڭ تاپسىرماسىن ىسكە اسىرۋ ءۇشىن ازىرلەندى. ءبىرىنشى بلوك - ەڭبەكاقى قورىنا جۇكتەمەنى ازايتۋ. مەملەكەت باسشىسى وتكەن جىلعى قازاقستان حالقىنا جولداۋىندا جيىنتىق جۇكتەمەنى ازايتا وتىرىپ، ميكروبيزنەس جانە شاعىن بيزنەس ءۇشىن ەڭبەكاقى تولەۋ قورىنان الىناتىن ءبىرىڭعاي تولەمدى ەنگىزۋدى تاپسىرعان بولاتىن. قازىرگى ۋاقىتتا ەڭبەكاقى قورىنان مولشەرلەمەلەرى، ەسەپتەۋ بازالارى ءارتۇرلى بىرنەشە تولەمدەر جۇزەگە اسىرىلادى. بۇل تولەمدەردى ءبىر تولەمگە بىرىكتىرۋ ۇسىنىلىپ وتىر. الەۋمەتتىك اۋدارىمدار مولشەرى قىزمەتكەرلەرگە تولەنەتىن بولاشاق تولەمدەرگە اسەر ەتەتىندىكتەن، جۇكتەمەنى جەكە تابىس سالىعى ەسەبىنەن تومەندەتۋ كوزدەلىپ وتىر. ءبىرىڭعاي مولشەرلەمە مىندەتتى زەينەتاقى جارنالارىن ەنگىزۋدى جانە الەۋمەتتىك اۋدارىمدار مولشەرلەمەسىنىڭ ءوسۋىن ەسكەرەتىن بولادى. تولەمدى ارناۋلى سالىق رەجيمدەرىندەگى ميكروبيزنەس جانە شاعىن بيزنەس سۋبەكتىلەرى ەرىكتى نەگىزدە قولداناتىن بولادى. سوما ءبىرىڭعاي جيىنتىق تولەم تەتىگىنە ۇقساس بولىنەدى»، - دەدى ق ر ۇلتتىق ەكونوميكا ءمينيسترى الىبەك قۋانتىروۆ.

ونىڭ ايتۋىنشا، بۇل تۇرعىدا ءبىرىڭعاي تولەم سالىق پەن ەڭبەكاقى تولەمدەرىن ەسەپتەۋدى جەڭىلدەتىپ قانا قويماي، سالىق جۇكتەمەسىن ازايتۋعا دا مۇمكىندىك بەرەدى.

سونىمەن قاتار، تۇزەتۋلەردىڭ ەكىنشى بلوگى سالالىق زاڭنامالارداعى وزگەرىستەرگە قاتىستى بولىپ تۇر. كونستيتۋتسيالىق سوتتىڭ قۇرىلۋىنا بايلانىستى بۇل سوتقا جۇگىنگەن كەزدەگى مەملەكەتتىك باجدى بەلگىلەۋ جانە حالىقتىڭ الەۋمەتتىك وسال توپتارىن اتالعان باجدان بوساتۋ ۇسىنىلىپ وتىر. كەلەسى نورما جەر قويناۋىن پايدالانۋ سالاسىنا قاتىستى. 2024 -جىلدان باستاپ مەملەكەتتىك بالانستى جۇرگىزۋ توقتاتىلادى. قورلار جاڭا جۇيە بويىنشا باعالانادى. وسىعان بايلانىستى پايدالى قازبالاردى ءوندىرۋ سالىعىن سالۋ وبەكتىسىن وزگەرتۋ ۇسىنىلادى.

«تۇزەتۋلەردىڭ ءۇشىنشى بلوگى وتاندىق تاۋار وندىرۋشىلەردى ىنتالاندىرۋعا باعىتتالعان. بالىق اۋلاۋ كاسىپورىندارى بالىقتى وڭدەۋ كەزىندە قوسىلعان قۇن سالىعىن %70 عا ازايتۋ تۋرالى نورما ۇسىنىلدى. قازىر مۇنداي جەڭىلدىكتى بالىق ءوسىرۋشى قوجالىقتار قولدانادى. قانت ءوندىرىسىن ىنتالاندىرۋ ءۇشىن شيكى قانت يمپورتىن قوسىلعان قۇن سالىعىنان بوساتۋ، سونداي-اق قانت وندىرۋشىلەر ءۇشىن قوسىلعان قۇن سالىعى بويىنشا جەڭىلدىكتىڭ قولدانىلۋ مەرزىمىن ۇزارتۋ ۇسىنىلىپ وتىر. ال كەلەسى نورما تازارتىلعان التىندى ساتۋعا قاتىستى. قازىر ۇلتتىق بانككە مۇنداي التىندى ساتۋ كەزىندە قوسىلعان قۇن سالىعىنان بوساتۋ ەسكەرىلگەن. وسى نورمانى التىندى زەرگەرلەرگە دە ساتۋ كەزىندە قولدانۋ ۇسىنىلدى»، - دەدى مينيستر.

بۇدان بولەك، تۇزەتۋلەردىڭ كەلەسى بلوگى جەكە ادامداردىڭ تولەمدەرىنە قاتىستى. چەك بەرمەۋ فاكتىلەرى تۋرالى حابارلاعانى ءۇشىن سىياقى الۋ، يپوتەكالىق كرەديت بويىنشا بەرەشەكتى ەسەپتەن شىعارۋ، جالعا الۋ قۇنىن تومەندەتۋ جانە تۇرعىن ءۇيدى جالعا الۋعا بيۋدجەتتىك سۋبسيديالار العان كەزدەگى سالىق سالۋ تاۋەكەلدەرى جويىلدى.

ق ر اۋماعىنا 2022 -جىلعى 1-قىركۇيەككە دەيىن اكەلىنگەن اۆتوموبيلدەردى زاڭداستىرۋ كەزىندە باستاپقى تىركەۋ ءۇشىن 200000 مىڭ تەڭگە سوماسىندا الىم مولشەرلەمەسىن بەلگىلەۋ ەسكەرىلگەن.

«ەلەكتر تۇرمىستىق تەحنيكانى ءوندىرۋ بويىنشا جەڭىلدىكتەر نارىققا قوسىمشا ينۆەستورلاردى تارتىپ، جوعارى مۋلتيپليكاتيۆتىك اسەر بەرەدى، بۇل وندىرىستىك الاڭداردى ورنالاستىرۋدى ۇلعايتۋعا وڭ اسەر ەتەدى. 2022 -جىلعى 1-قىركۇيەككە دەيىن اكەلىنگەن اۆتوموبيلدەردى زاڭداستىرۋ ماقساتىندا العاشقى تىركەگەنى ءۇشىن ءبىرىڭعاي الىمنىڭ بەلگىلەنۋى 300 مىڭعا جۋىق اۆتوكولىكتى ەسەپكە قويۋعا جاعداي جاسايدى، سونداي-اق وسى اۆتوموبيلدەر بويىنشا كولىك قۇرالدارىنا سالىناتىن سالىق جەرگىلىكتى بيۋدجەتتى تولىقتىرادى. تۇتاستاي العاندا اتالعان زاڭ جوباسى سالىق تولەۋشىلەرگە، مەملەكەتتىڭ مۇددەلەرىنە، سونداي-اق ەل ەكونوميكاسىنا وڭ اسەرىن تيگىزەدى دەپ ەسەپتەيمىز»، - دەدى سەناتور عۇمار دۇيسەمبايەۆ.

ەسكە سالساق، وسى جولعى كۇزدەگى جولداۋىندا مەملەكەت باسشىسى قاسىم-جومارت توقايەۆ بيىلعى 1-قىركۇيەككە دەيىن ەلگە اكەلىنگەن اۆتوكولىكتەرگە قاتىستى احۋالدى رەتتەۋ كەرەك ەكەنىن ايتتى.

«ولاردى زاڭداستىرۋ ماقساتىندا ۋتيليزاتسيا جانە العاشقى تىركەۋ ءۇشىن تولەنەتىن قارجى كولەمىن 200-250 مىڭ تەڭگەدەن اسىرماي، بارىنە بىردەي جانە ءبىر رەتتىك الىم الۋدى ۇسىنامىن. بۇل - ىزدەۋ سالىنباعان جانە كەدەن راسىمدەرىنەن وتكەن كولىكتەرگە عانا قاتىستى شارا»، - دەدى پرەزيدەنت.

ق ر ىشكى ىستەر ءمينيسترى مارات احمەتجانوۆ ەلىمىزدە راسىمدەلمەگەن 300 مىڭ شەتەلدىك كولىك بار ەكەنىن ايتتى.